Daily news
Екранизирани автентични настани и биографии во фокусот на „Берлинале“ – мајсторски „оживеани“ Роми Шнајдер, Џон Калахан
Од Берлин за „Макфакс“ Ана В.
Берлинската улица „Постдамер“ и објектите „Берлинпалас“, хотелот „Хајат“ и кино-салите во „Синемакс“ и „Синестар“ уште неполни четири дена ќе бидат во објективот на најважните филмски збиднувања во Европа и во светот. Иако без нагласена еуфорија, се чувствува кулминацијата на исчекувањето на добитниците на наградите, а уште три ноќи црвениот тепих на „Постдамер“ е отворен за фановите и филмските ѕвезди што ќе ја поздрават публиката.
Околните објекти и натаму се места за средби на филмските професионалци и можност за афирмација на некои кинематографии кои се домаќини на овие двочасовни коктели. Сè на сè, големата традиција на Берлинскиот филмски фестивал, кој годинава го бележи 68. издание, не остава простор за грешки, па така високопрофесионалната организација наметнува чувство дека сè се одвива со една голема леснотија.
Почитта кон новинарите, кои ги има близу 2000 од целиот свет, е на прво место, така што според пропишаните протоколи, овозможена им е беспрекорна работа и хостирање во секоја смисла. Токму силата на седмиот печат на редовните прес-конференции од филмаџиите бара искрени и соодветни одговори на прашањата врзани за нивното дело, но и не ги поштедува од коментари доколку добие арогантен или воопшто не добие одговор.
А токму тука, во Берлин, гламурот не се манифестира како недостижна категорија со која кокетираат ѕездите, туку во духот и либералноста на самиот концепт на „Берлинале“, ѕвездите се доближуваат до публиката преку медиумите. Сепак, сврталишта места за работен ручек и забава на филмските ѕвезди се резервирани престижните кафе „Париз“ и ресторанот „Борхес“.
За фаворити и потенцијални добитници е секако рано да се зборува, но вчерашната проекција на новиот филм на Гас Ван Сант, Don’t Worry, He Wont Get Far on Foot со Жоакин Феникс и Марк Вебер, ги собра сите атрибути на критиката – од речиси беспрекорно сценарио до одлични режисерски решенија. Драмата за авторот на анимиран цртеж и мајстор на духовитиот стрип Џон Калахан, човек кој наспроти својот хендикеп (на 21 година е сосема парализиран) успева да ја најде радоста на животот, е целовито филмско остварување, кое можеби во силната конкуренција на доминантните англосаксонски копродукции, но и изненадувањата што стигнуваат од азиските кинематографии се наметна високо пред очите на критиката.
На прашањата упатени до Ван Сант за филмот, тој не беше многу расположен да образложува, што стана предмет на забелешка од страна на новинарите. Актерот Жоакин Феникс, кој е на висина на задачата во карактерот на Калахан, пак, зборуваше за искуството и сложената постапка и посветеноста за да се извади оваа улога.
Работен во манирот на апсурдите на Тарантино, од Фарси стигнува филмот на Мани Хагиги, со наслов „Свиња“, што е вистинско освежување кога станува збор за филмови од овој дел од светот. Шармантна главна улога и сценарио за црна комедија, со естетика што ја нагласува традицијата на иранската иконографија, ѕвездите од овој филм беа дочекани со овации на дефилето од црвениот тепих.
Голем интерес предизвика и биграфскиот филм „3 дена во Квиберон“ ( 3 days in Quiberon) за драматичниот живот на легендарната актерка Роми Шнајдер. На режијата се потпишува Германката Емили Атеф, чија кариера во филмот е посветена токму на итражувањата на личните драми врзани за жените. Иако, филмот поради неговата преекстензивност во должината и повторувањето на кадрите губи од суштинската филмска наметливост, сепак неверојатната сличност на актерката која ја игра Роми Шнајдер и посветеноста на ликот остави голем впечаток.
Филмот уште повеќе добива поени поради неговата актуленост во мигот кога и овој фестивал поттикнат од холивудските колеги ја поддржува кампањата за борба против предаторите во филмската индустрија. А токму Шнајдер и нејзината бурна биографија, која според едни ја позиционира во слаба личност која ќе подлегне пред славата и личните трагедии, но според други, пак, таа е силна личност која до последно се бори за да опстане во суровата филмска индустрија. Во интервјуто за „Холивуд репортер“ Атеф вели дека Шнајдер сигурно би била „една од оние кои би ги поддржале жените во борбата да не бидат жртви на сексуално вознемирување, иако таа самата ретко кога се разбудила без некого покрај себе“.
Уште еден филм базиран на веродостоен трагичен настан од 1976 година, кога е киднапиран авионот на релација Париз-Тел Авив. Стотина заложници ќе завршат во Уганда за време на диктатирата на Иди Амин. 7 Days in Entebbe на Жозе Падила е англиско-германска копродукција која во манирот на овој режисер го користи овој настан за да го осветли апсурдот на насилството, стравот и деструкцијата. Одличен дизајн и работа на директорот на фотографија, моќни естетски решенија, оваа акциона драма со право го нашла местото во компетитовната програма на Берлин.
За време на одржувањето на фестивалот Берлинскиот копродукцискиот маркет, кој е дел од Европскиот филмски маркет, успеал да оствари 1300 средби, а „Еуроимаж“ додели три главни награди за поддршка на проекти за идната година.
Можност за презентација на глобалниот филмски маркет добија и македонските проекти „Жртва“ во режија на Марија Џиџева, „Сведок“ во режија на Митко Панов и „Враќање“ во режија на Катсриот Абдили.
Петчленото интернационалното жири предводено од германскиот режисер Том Тиквер, веројатн,о веќе ги издвојува потенцијалните добитници, но секако неизвесноста останува до самиот крај и завршната церемонија на затворањето на 68.издание на Берлинскиот филмски фестивал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.