Daily news
Ексминистерката за култура пак си го барала пасошот – СЈО ја одби
Ексминистерката за култура, Елизабета Канческа-Милевска, тропнала на вратата на Јавното обвинителство на РМ за судот да ѝ го врати пасошот. Но, спротивно од случајот на Сеад Кочан, кога Обвинителството на Зврлевски се прогласи за надлежно да го застапува предметот пред Врховниот суд, од ЈОРМ овој пат рекле дека не се надлежни и за тоа барање да се обратат во СЈО. „Јавното обвинителство на Република Македонија ценеше дека не е надлежно да постапува по доставената иницијатива и ја препрати во надлежното Јавното обвинителство за гонење кривични дела поврзани и кои произлегуваат од содржината на незаконското следење на комуникациите на натамошно постапување“, велат од ЈОРМ за „Макфакс“.
Сè започнало на 11 август кога поранешната министерка до Јавното обвинителство на РМ поднела иницијатива со барање за заштита на законитоста судот да ѝ го врати пасошот, кој ѝ е одземен за случајот „Тендери“. Информацијата за „Макфакс“ ја потврди нејзиниот адвокат, Еленко Миланов. Aдвокатот вели дека во случајот нема второстепеност на постапката бидејќи Катица Јанева е и застапник на обвинението, за чие барање за заштита на законитоста, повторно таа решила да го отфрли.
Од специјалното обвинитлство велат дека единствено тие се надлежни да постапуваат во сите три инстанци на предметите кои се под нивна надлежност. „Законот за јавно обвинителство за кривични дела поврзани и кои произлегуваат од содржината на незаконското следење на комуникациите“ е јасен. Ова Јавно обвинителство е овластено да постапува во сите три инстанци во предметите по наша надлежност. Во овој контекст ние постапивме и кога беше поднесено БЗЗ во случајот „Труст“ бидејќи и во тој случај надлежно обвинителство беше токму ова јавно обвинителство“, велат од СЈО за „Макфакс“. На крајот на јули скопска Апелација одлучи да не ѝ определи притвор на Канческа-Милевска, па како поблага мерка одлучи да ѝ го одземе пасошот.
За Кочан, СЈО е ненадлежно, за Канческа-Милевска – надлежно
За разлика од одлучувањето за притворот на Сеад Кочан, Јавното обвинителство на РМ го известило СЈО дека тие се надлежен орган пред кој Канческа-Милевска може да го поднесе барањето. Со оваа одлука Јавното обвинителство со кое раководеше Марко Зврлевски фактички го призна СЈО како надлежно да поднесува барање за вонреден правен лек. Иако Јавното обвинителство во одлуката за преиспитување на притворот на бизнисменот Сеад Кочан немаше надлежност врз предметот, сепак, Врховниот суд на крајот го прифати. На крајот СЈО одлучи дека не постојат причини да ѝ се одобри барањето на ексминистерката за култура. Таа останува без пасош.
За потсетување, Обвинителството на Марко Зврлевски побара Врховниот суд да го уважи барањето за заштита на законитоста на јавниот обвинител да ги укине претходните решенија и предметот за притворот на Кочан да го врати на повторно одлучување. Претседателот на Врховниот суд, Јово Вангеловски, тогаш изјави дека според Законот за кривичната постапка право да побара заштита на законитоста има само јавниот обвинител на РМ, а СЈО го повлече барањето за заштита на законитоста поднесено од ЈОРМ. Врховниот суд на седница во април не донесе одлука, односно начелен правен став за прашањето дали Специјалното јавно обвинителство смее да поднесува барања за заштита на законитоста како вонреден правен лек до Врховниот суд или ексклузивно право на тоа има само државното Јавно обвинителство. Претседателот на Врховниот суд, Јово Вангеловски, за да го прифати барањето за заштита на законитоста, поднесено од обвинителот Ацо Колевски од ЈОРМ, иако предметот е на СЈО, неколкупати го менуваше составот на Кривичниот совет додека не се осигури дека ќе обезбеди мнозинство за да го ослободи Сеад Кочан од притвор. Од Советот првин беше тргната судијката Лидија Неделкова, по неа судијката Лидија Тасева, за на нивно место да биде ставена граѓанската судијка Рахилка Стојковска, која како трет глас ѝ даде легитимитет на одлуката Кочан да биде ослободен, заедно со гласовите на Вангеловски и Ристо Катавеновски.
Врховниот суд веќе два месеца не донел одлука за барањето за заштита на законитоста од СЈО во предметите „Талир“ и „Пуч“.
В. Маглешов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.