Daily news
Жерновски со засегнатите ги разгледа состојбите околу IB технологијата во ООУ “Св. Кирил и Методиј“
Градоначалникот на општина Центар, Андреј Жерновски, заедно со раководителот на одделението за образование, во петок на средба ги повика претставниците на советот на родители, претставници од наставничкиот совет и училишниот одбор, заинтересирани родители и директорот на ООУ “Св. Кирил и Методиј“ за да се проговори отворено за укинувањето на IB методологија.
За ова расправаше наставничкиот совет, кој со 75% од членовите се изјасни за укинување на овој проект, 80% од родителите на децата се исто – против нивните деца да продолжат да учат по оваа методологија, а во училишниот одбор, од вкупно 8 члена, 7 се за укинување на IB методологијата, а 1 бил воздржан.
Пет родители се незадоволни од одлуката нивните деца да не продолжат да учат по оваа методологија
Општина Центар, рече градоначалникот Андреј Жерновски, е комплетно исклучена од воведувањето на оваа методологија. Став на Жерновски и на општината е ако програмата носи бенефит на децата, да продолжи, во спротивно, истата да престане.
На забелешката на еден од родителите дека се работи за тотално промашен проект, кој децата не го разбираат, родителите имаат само проблеми, а наставниците се дополнително оптоварени, ова било само перење пари, овозможено од владата во заминување. Жерновски реагираше и побара да се избегне политиката во ова прашање, во спротивно рече дека ќе го напушти состанокот.
Директорката на ООУ “Св. Кирил и Методиј“, Вилма Поповиќ, кажа дека оваа методологија не е предвидена во Националната стратегија за образование, туку за ад хок решение кое е нецелисходно. Таа праша, каде се и како се потрошени 100.000 евра, пари од Министерството за образование и наука, префрлени на сметката на училиштето за имплементирање на оваа методологија.
Родителите реагираа дека од парите не виделе ништо, дека нема библиотеки, кабинети, работилници, лаборатории, ботаничка градина и побараа случајот да се пријави во Обвинителство и да се направи ревизија.
Директорката, која на оваа функција е од пред една година, јасно посочи дека не сака, како што од неа се бара, ретроактивно да потпишува и плаќа некакви фактури, кои континуирано пристигнуваат на име на физичко лице во правниот субјект – училиштето.
Тројца од родителите рекоа дека идејата да се учи по IB програма е добра и побараа да се испитаат можните криминали и ненаменското трошење на парите. Се согласија дека програмата е квалитетна, но не профункционирала, бидејќи работата е погрешена уште на самиот почеток.
Дел од наставничкиот кадар се пожали дека кога се воведувала програмата, во 2013-та година, тие не биле ниту прашани, ниту исконсултирани за ова и дека врз нив е вршен мобинг од страна на поранешната директорка.
Раководителот на Одделението за образование, Јагода Јанковска, заклучи дека моменталната состојба е резултат на лошиот старт, бидејќи не се исконсултирани трите клучни тела во училиштето- наставничкиот совет, советот на родители и училишниот одбор. Проектот, рече таа, тогаш е воведен на “мала врата“. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.