Daily news
Загрепчанка од угледно семејство војува за ИСИС
Во областа под контрола на ИСИЛ останаа седум лица што имаат хрватско државјанство – шест од нив имаат двојно државјанство и никогаш не живеле постојано во Хрватска, а само една жена има единствено хрватско државјанство.
Тоа е 30-годишната Дора Билиќ, чија активност пред неколку години беше забележана во Рака во Сирија, каде што е упориштето на силите на Исламската држава. Таму таа беше со својот сопруг, државјанин на БиХ, кој им се приклучи на силите на ИСИС, пишува „Вечерњи лист“.
Загрепчанката од почитувано семејство, израсната во католички дух, ги шокираше блиските кога премина во ислам. Според „Вечерњи лист“, Дора, по добивањето одлични оценки во средното училиште, се запишува на Правниот факултет, но таму сфатила дека нејзините студии не ѝ претставуваат предизвик, па продолжила да се образова за физиотерапевт. Таа зборувала неколку јазици, сакала да патуваат во Европа и да посетува музеи, а пресвртна точка во нејзиниот живот се случува со доаѓањето во Лондон. Таму го запознала својот прв сопруг, тогаш сè уште христијанин, кој набргу преоѓа во исламот и се приклучил на радикални муслимански организации.
Неговото влијание врз Дора било исклучително силно, така што таа исто така се откажала од својата вера и го избрала исламот. Меѓутоа, бракот не траел. Дора го напуштила својот сопруг бидејќи не бил доволно екстремен. Така, по разводот, на крајот на 2012 година, одлучила да најде некој по нејзин вкус, порадикален.
Таа се запознала со Сенад Авдиќ, наречен Чадо, кој во тоа време живеел во едно село во близина на Брчко со својата сопруга и децата. По средбата со Дора, бракот се распаднал, а парот се преселил во Сирија, каде што наводно добиле и дете. Таму, наводно, и била ранета во нападите на коалициските сили врз позициите на ИСИС.
Сите овие информации го шокираа семејството Билиќ и сите оние што ги познаваат. Таткото на Дора е познат како експерт за земјоделство, мајка ѝ ве архитект, а брат ѝ е адвокат. Баба ѝ е магистер на фармација, а дедо ѝ е електроинженер, односно семејство на интелектуалци, што прави уште потешко да се разбере екстремната радикализација што ја поминала 30-годишната Билиќ.
Семејството на Дора не сака да дава изјави, велат само дека таа била употребена за пропаганда и дека го осудуваат секој, па и исламскиот радикализам и тероризам.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.