Daily news
Заев: Ги зајакнуваме партнерските односи со НР Кина за идна експанзија на економската соработка
Живееме во време во кое сме соочени со многу предизвици и тоа од лидерите бара фокусираност и работа насочена кон креирање можности за економски развој и услови за унапредување на животниот стандард на граѓаните, а со процесот на глобализацијата овие теми станаа исклучително важни, рече премиерот Зоран Заев во своето обраќање на Самитот на шефови на влади за соработка на земјите од централна и источна Европа со НР Кина.
Во состав на делегацијата што го придружува премиерот се Кочо Анѓушев, заменик на претседателот на Владата задолжен за економски прашања, Крешник Бектеши, министер за економија, Роберт Алаѓозовски, министер за култура, Виктор Димовски, државен секретар во Министерството за надворешни работи, и национален координатор за соработка со групата 16+1, како и Фатмир Бесими, советник за економија, и Митко Андреевски, советник за енергетика во Кабинетот на Заев.
Премиерот Заев на пленарната сесија на економскиот, трговскиот и финансиски форум на овој самит, познат и како 16+1, ги претстави позициите на Република Македонија пред другите учесници во самитот.
„Сакам да истакнам дека Владата на Република Македонија ќе продолжи со активностите кои имаат за цел значително да ја подобрат бизнис-климата преку воспоставување подобра институционална инфраструктура за привлекување инвестиции, што ќе повлече забрзување на економскиот раст, развој на приватниот сектор и отворање нови работни места“, посочи премиерот Заев пред присутните шефови на влади на земјите од централна и источна Европа, и пред највисоките владини претставници на Народна Република Кина.
Премиерот Заев во своето излагање оддаде признание за Варшавската иницијатива со оценка дека таа целосно ги остварила целите, кои, меѓу другото, обезбедија земјите од централна и источна Европа да прераснат во мост кој ги поврзува земјите од западна Европа, централна Азија и Кина. Овој потенцијал, нагласи премиерот Заев, е од извонредно значење за регионот и дека земјите во него треба да го искористат овој момент за реални и конкретни проекти кои ќе донесат економски раст.
„ Би сакале да бидеме вклучени во повеќе настани за промоција на нашата трговија во рамки на процесот за соработка 16+1. Би сакал да апелирам кон кинеските институции да продолжат уште повеќе да го промовираат принципот на трговски олеснувања, што треба да резултира со олеснет пристап на нашите производи до кинеските пазари и учество на саеми и други бизнис-активности“, порача премиерот Заев.
Премиерот Заев ги информираше присутните на форумот дека Република Македонија ќе биде домаќин на неколку важни настани поврзани со процесот на соработка со Народна Република Кина како што е „Кина SEEC Координативен центар за културна соработка“.
„ Координативниот центар за култура ќе биде основан во јануари, 2018 година во Министерството за култура на Република Македонија. Би сакал да ве информирам дека нашата земја ќе биде домаќин и на 5. Кинески симпозиум за соработка на земјите од централна и источна Европа, од висок ранг на тинк танк организации во 2018 година и на 4. Состанок на министри за културна соработка во 2019“, најави премиерот Заев.
Во духот на соработката со Народна Република Кина премиерот Заев рече дека соработката, меѓу другото, се одвива во области како што се здравството и медицината и за таа цел со одлука на владата, во согласност со Законот за алтернативна и комплементарна медицина, беше основан Центарот за традиционална кинеска медицина во Штип.
„ Дозволете ми да го истакнам моето силно уверување дека денешниот самит ќе обезбеди солидна основа за зголемување на соработката, а посебно за зајакнување на економските врски во духот на важноста што Народна Република Кина ја има за идната експанзија на економската соработка помеѓу земјите од нашиот регион“, заклучи премиерот Заев на крајот од своето обраќање на пленарната сесија во рамките на Самитот на шефови на влади за соработка на земјите од централна и источна Европа со Народна Република Кина, што се одржува во Будимпешта.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.