Daily news
За Димитров, прашањето не е кога, туку дали сакаме во НАТО
Сакаме да бидеме 30-та членка на НАТО, но тоа не зависи само од Македонија, изјави шефот на дипломатијата, Никола Димитров, на конференцијата на тема „Македонија кон целосно членство во НАТО“.
„Зачленувањето во НАТО не зависи само од Македонија. Во согласност со формулата од Букурешт од 2008 година, зависи и од Грција, зависи и од тоа колку бргу ќе успееме да ги тргнеме дополнителните критики што ги добивме на самитот во Варшава во делот на одговорност, владеење на правото, слобода на медиумите. Клучното прашање не е кога, дали побрзо или на среден рок, туку сакаме ли ние како опшество и како нација да си ја зацврстиме иднината, да поминеме една линија од која нема да има враќање назад“, изјави шефот на дипломатијата, Никола Димитров.
За дилемата под кое име ќе влеземе во НАТО, Димитров рече дека на првата посета на премиерот Заев во Брисел било јасно кажано дека Македонија во согласност со Привремената спогодба е подготвена да прифати покана под привремената референца што се користи во ОН за да влезе во алијансата.
„Тоа е во согласност со Привремената спогодба и со тоа како Меѓународниот суд на правдата во Хаг ја толкува. Убедени сме дека тоа ќе придонесе и кон создавање поголемо разбирање и во нашата јавност бидејќи кога го блокирате својот сосед со години, реакцијата не е поголема конструктивност, реакцијата е дефанзивност и одбранбен став. Сега тоа не зависи само од нас. Ние не сакаме да почнеме игра на обвинувања со Грција бидејќи нашето членство во НАТО во основа значи дека Грција треба во нас да гледа сојузник и ние во Грција треба да гледаме сојузник“, изјави Димитров.
„Македонија веќе придонесува кон регионалната и глобалната безбедност. Знаеме дека вашиот пат кон НАТО е понекогаш фрустрирачки, но издржавте. Има поддршка од јавноста и од сите етнички заедници за ваше членство во НАТО и се надеваме дека ваквиот обединувачки став и понатаму ќе продолжи“, изјави американскиот амбасадор во земјата, Џес Бејли.
Германскиот амбасадор во Република Македонија, Норберт Геберих, ја потврди поддршката за зачленувањето во НАТО. Според него, неодамнешното повлекување на српските дипломати од амбасадата во Скопје покажува дека национализмот и етничката поделеност повторно се во подем и најдобар начин да се стабилизира Македонија е земјата да влезе во НАТО.
„Последниот настан со повлекувањето на српските дипломати од амбасадата во Скопје покажува дека национализмот и етничката поделеност повторно се во подем. Влезот во НАТО е најдобар начин да се стабилизира земјата и да се посвети на реформската агенда. За ваквите процеси потребни се храброст и сила“, рече Герберих.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.