Daily news
Зврлевски молчи два дена по прозивките да поднесе оставка
Не престануваат прозивките до државниот јавен обвинител Марко Зврлевски сам да поднесе оставка и да не чека да биде разрешен од Собранието. Новиот премиер, Зоран Заев, уште во средата навечер, веднаш по изборот на новиот владин кабинет, го повика Зврлевски да достави оставка и да отвори пат за побрзи реформи во правосудството.
И по два дена од „фрлената ракавица“ на новата власт, Зврлевски молчи и ги избегнува новинарските прашања околу неговите планови. Сепак, извори блиски до Зврлевски за Макфакс тврдат дека државниот јавен обвинител нема намера сам да се повлече и оти смета дека нема основи за негово разрешување, затоа што не постапувал нестручно и незаконски.
Професорката Мирјана Најчевска, пак, смета дека Зврлевски ги исполнува сите услови за разрешување државен јавен обвинител. Дури оди и чекор натаму и вели дека треба и да му се суди.
Член 67 од Законот за јавно обвинителство вели дека Јавниот обвинител на Република Македонија се разрешува од функцијата јавен обвинител пред истекот на мандатот: поради незаконито, ненавремено или недоволно стручно вршење на функцијата, со своето однесување и дејствување покажува дека не е способен за извршување на функцијата, ако не поднесува барање за покренување на кривична постапка за случаи предвидени со закон,поради нарушување на угледот на функцијата.
Таа вели дека Зврлевски не исполнува еден услов, не исполнува два услови, туку ги исполнува апсолутно сите можни услови предвидени во законот како причини за разрешување од функцијата.
„Јас лично мислам дека треба да биде суден и осуден, меѓутоа и во неговиот и во сите други случаи каде што станува збор за луѓе од правосудниот систем мора да биде одредена казна ЗАБРАНА ЗА ВРШЕЊЕ ДЕЈНОСТ. Не после да ми се појават како адвокатчиња, нотарчиња, извршители и да бенефицираат од направениот криминал, вели професорката Најчевска.
Марко Зврлевски е петтиот по ред државен јавен обвинител од осамостојувањето (поточно од донесувањето на новиот Закон за јавно обвинителство. Негови претходници беа Стеван Павлески, Ставре Џиков, Александар Прчевски и Љупчо Шврговски. Неговото разрешување нема да биде никаков преседан, бидејќи при промена на власта првиот човек на Обвинителството секогаш е прв на удар, бидејќи се смета како “продолжена рака“ на претходната владејачка гарнитура. Ниту еден од неговите претходници (со исклучок на Љупчо Шврговски кој истера цел шестгодишен мандат,но не конкурираше за втор мандат),не останаа до крајот на законскиот рок и беа разрешени, заради „нестручно и несовесно работење“.
Владата на ВМРО-ДПМНЕ на 11 август го почна мандатот на 25 август 2006 година, а веќе на 29 септември достави предлог за разрешување на тогашниот државен обвинител Александар Прчевски. На 15 октомври Собранието го разреши, без да го повика на седница.
Зврлевски стапи на функцијата на 25 јануари 2013 година, а дојде од позиција на прв човек на скоспкото јавно обвинитлество. Беше избран со 58 гласови за, и ниту еден против или воздржан.
Во неговото работно портфолио е запишано дека првото работно искуство го има како учесник во Проект „Обичајното право како извор на правото“ при Македонската академија на науките и уметностите (1988-1989), по што кратко време работи како новинар во Македонската радио телевизија. Од приправник по правна струка во тогашното Општинско јавно обвинителство во Скопје (1989-1991), преку стручен соработник (1991-1998), адвокат од областа на казненото право (1998-2000), заменик-јавен обвинител во Основното јавно обвинителство – Скопје; (2000-2005). Во декември 2005 година е распореден во Одделението за гонење на сторители на кривични дела од областа на организираниот криминал и корупција, а по трансформирањето на одделението, е избран за јавен обвинител во Основното јавно обвинителство за гонење на организиран криминал и корупција. Од ноември 2009 до јануари 2013 година како Основен јавен обвинител раководи со Основното јавно обвинителство – Скопје.
Постапката за избор на нов државен обвинител предвидува Собранието да распише оглас по предлог на Владата, а рокот за поднесување на пријавите е 15 дена од денот на објавување на огласот во „Службен весник“. Според член 41 од Законот за јавно обвинителство, „Советот на јавни обвинители на Република Македонија, на барање на Владата на Република Македонија во рок од 15 дена од денот на приемот на барањето, до Владата доставува образложено позитивно или негативно мислење во писмена форма за сите пријавени кандидати на огласот што ги исполнуваат условите согласно со закон“. За кандидатот што ќе го предложи Владата за јавен обвинител, кон предлогот се доставува и мислењето од Советот. Ако Советот на обвинители во првиот рок не се изјасни, има и дополнителен рок од 15 дена да достави мислење. Ако и во тој рок не достави, се смета дека мислењето е позитивно.
За разрешување на Зврлевски е потребно просто мнозинство. Нему му остануваат неколку можности. Прво, да се врати во матичната средина, а тоа е скопското јавно обвинителство. Второ, да користи апанажа од една година, а по истекот на овој рок да најде ново вработување. Трето, веднаш да замине во адвокатура по примерот на своите претходници. И последната, да остане како обвинител во Јавното обвинителство на Република Македонија, со кое раководи.
Гордана Дувњак
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.