Daily news
(ВИДЕО) ЗНМ: Новинарите тепани и киднапирани, насилниците никој не ги гони
Новиот извештај за состојбата на медиумите и безбедноста на новинарите, изработен од ЗНМ, повторно покажува дека новинарите работат во небезбедни услови, а во минатата година беа тепани, киднапирани, биле повикувани на јавен линч, а често примале и закани. Претседателот на здружанието на новинарите на Македонија, Насер Селмани, вели дека e влошена и професионалната етика и нивото на цензура. Според извештајот, погрешната политика на минатата влада, користењето на јавните пари на приватните медиуми со цел да се контролира нивната уредничка политика, довела до фундаментални известувањa во медиумскиот сектор и ги ставила медиумите во непосакувани ризици.
„Насилниците и нивните ментори сакаат да ги замолчат новинарите. Минатата година регистрирани се 18 нови напади на новинари, од кои 13 физички напади, а, пак, другите се вербални, односно закани. Најбрутален напад е во 27 април, каде што насилниците кои влегоа во Собранието ги нападнаа новинарите, им одземаа опрема, а притоа, со оружје беа со часови држени, а полицијата не регираше. Насилниците сè уште не се казнети. Позитивно искуство имаме со полицијата, каде веднаш ги наоѓаат насилниците, но Обвинителство не ги процесира“
Насер Селмани потенцираше дека сè уште не се процесирани пријавите против Тони Михајловски, кој му се заканувал на новинарот Бранко Тричковски, и за Филип Петровски, кој навредувал новинари финансирани од СОРОС, додавајќи дека новинарите освен што немаат безбедност, тие имаат ниски плати, а немаат ниту договор за работен однос.
„ Па така, 45% од новинарите имаат помали плати од просекот, а кај некои од нив доцнат и платите. Има влијанија врз нивното пишување, односно уредниците им влијаат за да не пишуваат против лицата кои се рекламираат во нивните медиуми. Овие влијанија се и преку вербален, а некогаш и по физички пат“, додаде Селмани.
Според него, 95 отсто од нападите се извршени од претходната власт, односно сегашната опозиција. Селмани вели дека застрашувачки е што новата власт не е исто така заинтересирана за медиумите. Вистинската слика за грижата на новата власт кон медиуми го покажува моментот што процесирани се пријавите и нападите над политичарите кои се случија на 27 април, а не е процесирана ниту една пријава за нападите на новинарите.
„Ние работиме со сите институции и вршиме притисок тие да се на ниво на нивната задача, да ги преземат сите мерки за насилниците да се казнат. Единствена позитивна работа е што потпишавме меморандум за соработка со МВР. Неделава треба да се сретнеме со новиот јавен обвинител, пред кого ќе ја изразиме нашата загриженост за тоа како Обвинителството ги развлекуваше состојбите со решавање на нападите врз новинарите“, рече Селмани, одговарајќи како ќе се реши оваа лоша состојба со новинарите.
Извештајот ги карактеризира медиумите како партиски и независни. Истражувањето покажува дека состојбата со слободата на медиумите во Македонија се влошува и е речиси иста во однос на минатата година. Како што е наведено и во извештајот на Фридом хаус за 2017 година, медиумите во Макеоднија не се слободни, а според Индексот за слободата на медиумите на Репортери без граници, земјата се наоѓа на 111. место од вкупно 180 држави.
Кристијан Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.