Daily news
Зошто се однесуваме чудно кога ќе се вљубиме
Сте се вљубиле и не можете да се концентрирате на секојдневните обврски, а самоконтролата ви станала мислена именка? Љубовта навистина влијае на вашата способност да се концентрирате на задачите, но и на вашето тело и на однесувањето.
Ако ви се случило покрај лицето кое ви се допаѓа да се чувствувате дека не можете да го контролирате своето однесување и дека не можете да владеете над себе, не сте единствени. Истражување покажало дека колку некое лице е вљубено, толку има полоши резултати на когнитивните тестови, има помалку самоконтрола, а способноста за концентрација е послаба.
Причината за тоа е што во таквите моменти мозокот е преокупиран со размислување за потенцијалниот партнер или партнерка, поради што настанува проблем за одредување на приоритетите.
Меѓутоа, тоа не е единствен начин на кој љубовта влијае на вашето тело.
Кога се наоѓате блиску до лицето кое ви се допаѓа, често се чувствувате необично смирено, освен ако немате некоја конкретна причина да бидете вознемирени. Причина за таквата смиреност е што крвниот притисок во друштво на лицето во кое сте вљубени е понизок. Ова чувство нема врска со тоа дали од неодамна сте во таа врска или подолго.
Во моментите кога љубовта цвета и сте вљубени до уши, склони сте кон расправии со истиот пол. Љубовта ослободува хормон вазопресин, кој прави лицата од ист пол да ги доживуваме како некаква закана, без оглед на тоа како се однесуваат. Причина за тоа е што инстиктивно се обидуваме да го одбраниме она што го сметаме за свое.
Можеби не сте забележале, но кога шетате со партнерот, одите побавно. Истражувањето покажало дека во романтичните прошетки со партнерот го забавуваме своето одење за седум отсто, а причината за тоа е едноставна, полесно се одржува блискоста и интимноста кога не брзаме. Впрочем, веројатно е и дека одењето го забавуваме за подолго да уживаме во друштво на саканото лице.
Кога поминуваме време со партнерот, дефинитивно е дека го менуваме своето однесување, макар и несвесно. Во друштво на лицето во кое сме вљубени, го менуваме дури и ритамот на дишењето, така што го синхронизираме со неговото. Иако истражувачите немаат објаснување за ваквото однесување, сметаат дека најверојатно несвесно се обидуваме да го имитираме партнерот.
И на крај, пеперутките кои ги чувствувате во стомакот навистина постојат! Истражувањето покажа дека во состојба на вљубеност можат да се препознаат четири различни активности во мозокот. Три мозочни активности предизвикуваат чувство на емоционална возбуда, додека четвртата активност навистина делува на вашиот стомак, правејќи да ја чувствувате таа слатка напнатост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.