Daily news
Исфрлете ја негативната енергија од секојдневниот живот
1. Длабоко вдишете и издишете
Колку ова да ви се чини смешно, има ефект. Засолнете се на минутка во некоја тивка просторија или ходник и длабоко вдишете и издишете неколку пати. На тој начин вашите отчукувања на срцето ќе се смират, а мозокот ќе добие информација оти се е во ред. Лошите вести отпрвин ви се чинат како да е крај на светот, но во тој момент прво што треба да направите е да запрете, да затворите очи и длабоко да дишете. Запомнете, се ќе биде во ред.
2. Појадок
Иако знаеме дека појадокот е најважниот оброк за подобро да се подготвиме за новиот работен ден, повеќето луѓе не појадуваат, или денот го почнуваат со пиење филџан кафе на празен желудник, што е една од најлошите утрински навики. Интегралната кифла што сте ја купиле во пекарница не е лош избор, но на тоа пециво треба да се додаде барем уште еден јогурт, варено јајце или грст житарки. Со квалитетен појадок ќе му олесните на организмот да се бори со секојдневните предизвици.
3. Вежбање, играње, пеење
Која било активност која ве растоварува е добредојдена. Некому е тешко да се натера на вежбање по напорниот работен ден, особено ако работи физички работи. Меѓутоа, колку и да не ви се станува од каучот, пуштете си ја омилената песна. Не се вели залудно, „во здраво тело, здрав дух“. Трчајте, возете ролерки, велосипед, танцувајте дома или пејте под туш, се со цел под итно да се ослободите од негативната енергија.
4. Изградете си свое место за опуштање
Прво размислете што најдобро ве опушта. Тоа може да биде музика, шолја чај, разговор со пријатели, топла купка, миризливи свеќи… Уредете едно катче во домот или на работното место каде ќе можете да се опуштите. Најбитно е да откриете што ве опушта.
5. Изразете ги своите мисли и чувства
Понекогаш проблемот се наоѓа некаде длабоко во нас и често некаква секојдневна грижа околу некоја работа ќе го прекрие тој извор на негативна енергија, кој всушност е вистинска причина за стрес и незадоволство. Ако тешко се отворате кон своите блиски, обидете да ги запишувате своите мисли, бидејќи водењето дневник е еден од најдобрите издувни вентили. Со исчитување на сопствените мисли можеби ќе откриете која е вистинска причина за негативната енергија и на тој начин лесно ќе дојдете до решение на своите проблеми. Разговарајте со блиските и олеснете си ја душата бидејќи оние кои ве сакаат ќе ви дадат најдобар совет како да се ослободите од своите грижи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.