Daily news
Како правилно да се измие овошјето и зеленчукот?
Придржувајќи се до неколку едноставни совети, заштитете се себе и семејството од труење со суровите намирници.
Пред чистењето на овошјето и зеленчукот, потребно е да ја исчистите и работната површина, даските и приборот за сецкање и добро да ги измиете рацете со сапун и топла вода. Ако приборот не е чист, бактериите од површината на суровата храна можат да дојдат во внатрешноста во текот на сецкањето и лупењето.
Овошјето и зеленчукот за да бидат здрави за јадење, потребно е добро да се измијат за да ги отстраните сите бактерии и хемикалии кои се наоѓаат на површината, а плакнењето по млаз вода често не е доволно.
Зелениот лиснат зеленчук потребно е да се раздвои и да се држи потопен во вода неколку минути. Потоа листовите треба да се исцедат и да се повтори постапката. Водата ќе биде доволна за зеленчукот со органско потекло, но ако не сте сигурни во методот на одгледување, измијте го и со оцет.
Измешајте две чаши вода со половина чаша дестилиран бел оцет и во мешавината натопете ги листовите зеленчук 5 минути, па исплакнете ги со чиста вода. Исушете ги со чиста кујнска крпа. Така се намалува, но не и отстранува присуството на бактерии, а оцедот делумно може да делува на текстурата и вкусот на храната.
Зеленчукот како брокулата и карфиолот потребно е да ги држите во ладна вода една минута пред миењето со вода или со комбинацијата на оцед и вода. Зеленчукот и овошјето со дебела кора, како доматите и мангото, потребно е пред миењето да ги исчеткате со четка наменета исклучиво за сирови намирници.
Потребно е да се измијат и плодовите чија кора не се јаде, како лубеница и диња, за бактериите од површината да не дојдат на месото во текот на сечењето. Повеќето бактерии ќе се задржат и на остатоците на земјата со која некое овошје и зеленчук можат да бидат прекриени. Во тој случај е потребно најпрво да ги исплакнете намирниците под млаз вода, потоа е добро да ги истриете па тогаш да ги подготвите за јадење. Освен оцед, против пестицидот и бактериите делува и комбинацијата на сол и лимонов сок. Наполнете сад со вода и додајте во неа лажичка сол и сок од еден лимон. Во мешавината ставете ги зеленото овошје или зеленчукот и оставете ги да отстојат 10-15 минути. Потоа исплакнете ги со млаз вода, исушете ги и послужете ги.
Доколку не сакате да ги миете намирниците со ништо друго освен со чиста вода, тогаш потопете ги во текот на ноќта во вода и следното утро исплакнете ги со млака вода. Зеленчукот и овошјето не ги мијте веднаш по купувањето, зошто така брзо ќе се расипе. На било кој од наведените начини измијте ги намирниците непосредно пред употребата.
Спрејот за отстранување на хемикалии мора да делува барем десет минути.
Зеленчукот и овошјето можат да се измијат и со помош на спреј едноставен за подготовка. Купете шишенце со аеросоли и измијте го. Во него додадете лажица свежо исцеден сок од лимон, две лажици оцет и 250 мл вода. Затворете го добро и силно протресете за да се измешаат состојките. Овошјето и зеленчукот пред употреба ипрскајте ги со таа мешавина, оставете да делува десетина минути и исплакнете ги под млаз ладна вода. Избришете ги со чиста крпа пред пилингот и сецкањето. По плакнењето, вкусот и мирисот на оцедот нема да се чувстува.
Најмалку се третираат зелка, модар патлиџан, карфиол и ананас.
Внесот на овошје и зеленчук третирани со пестициди може да се намали со купување на органска произведена храна, но тоа за многумина е финансиски неприфатливо.
Доколку не можете да дојдете до органски намирници, бирајте ги оние кои се третираат со пестициди. Во таа група спаѓаат зелката, лукот, аспарагусот, модриот домат, дуњата, карфиолот, мангото, кивите, авокадото, ананасот и портокалите.
Меѓутоа, кај агрумите треба поголемо внимание и не се препорачува употреба на нивната кора, на пример во подготвување на колачи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.