Daily news
Како се облекувате според хороскопот?
ОВЕН
За овните се врзува елеганцијата и самоувереноста, а ја изразуваат на начин на кој тие се чувствуваат сигурни во себе. Без оглед на тоа дали ќе облечат нешто елегантно, спортско или формално – припадничките на овој знак секогаш ќе го носат со сигурност и самодоверба. Со боите и кроевите не експериментираат, туку сосема спротивното: се потпираат на провереното, и пред се’ удобното.
БИК
Практични се, ја сакаат едноставноста и класиката, како и сензуалните ткаенини. Прилично се конзервативни, па кога одат во шопинг купуваат само класични парчиња со кои е невозможно да се погреши. Нивни бои се: беж, сива, бела и црна.
БЛИЗНАЦИ
Љубопитни се, секогаш подготвени за патувања и нови авантури. Истото се однесува и на модниот свет – флертуваат со повеќе стилови. Бираат специфични и маркатни детали, најчесто во вид на модни аксесоари кои се издвојуваат и оставаат посебен впечаток. Дамите се одлучуваат за чанти или торби во неонски нијанси, големи ѓердани и обетки, како и блејзери со бохо дезени.
РАК
Припадничките на овој знак се прилично неприметни, а иако носат се’ што е модерно и ,,ин’’, сепак тоа е со доза на внимание. Секогаш се средени, но не премногу. Не сакаат да бидат претерано експонирани и коментирани во јавноста, па постојано се обидуваат да се уредни и средени, но ненаметливи. Дамите во овој знак бираат костуми со едноставен крој. Нивен избор се неутралните бои, во комбинација со фини детали што ќе им дадат допир на елеганција и префинетоста кон која се стремат.
ЛАВ
Креативни, горди, и пред се’ посебни. Лавовите ги води премисата дека доколку сакате да се чувствувате добро, тогаш мора и добро да изгледате, па се средуваат за секоја можна прилика, а не само оние кои го носат епитот ,,посебни’’. Сакаат да се ,,китат’’ со брендирани парчиња облека, но способни се и сосема обичната и секојдневна гардероба да ја направат скапоцена, давајќи и свој креативен потпис. Дамите во овој знак на себе имаат екстравагантни парчиња, како и впечатливи детали и ведри бои. Злато, сребро, бижутерија – лавот не пребира. Важно е добро да изгледа, но и секогаш да е во центар на вниманието.
ДЕВИЦА
Девицата е префинета, практична и организирана. Таа се чувствува убаво и пријатно само доколку се’ е на свое место. Многу се самокритични, па секогаш ги бираат до најситниот детал парчињата облека кои совршено им стојат, боите кои прилегаат на нивниот тен, како и ткаенини кои се удобни за носење. Девиците ги сакаат нежните нијанси на розова, сина, бледо жолта, но и беж, црната и сивата боја, а за гардеробата е пресудно воопшто да нема синтетика.
ВАГА
Вагите се уметнички души кои сакаат мирно опкружување околу себе, а не ги сакаат спротивставувањата и судирите, како во животот, така и во модата. Секогаш ги интересира туѓото мислење, па без оглед на тоа за која прилика се подготвуваат, тие мора да знаат што другите мислат, бидејќи најчесто се неодлучни и им треба совет. Во нивниот гардеробер ќе најдете убава и префинета, но и едноставна облека. Многу почесто се одлучуваат за маица и фармерки отколку за свечен фустан, освен кога приликата бара од нив да бидат подотерани – тогаш ќе дадат се’ од себе да бидат грациозни и да изгледаат совршено.
СКОРПИЈА
Скорпијата е суптилна, но драматична и сака внимание, особено во модата. Важно и’ е да има скапа и квалитетна гардероба, а истата ќе ја комбинира со едноставни и секојдневни парчиња облека кои ги поседува во сите бои. Припадничките на овој хороскопски знак секогаш сакаат добри чевли на потпетици и чанти. Што и да облечат, овие дами изгледаат добро, некогаш и препотентно, но никогаш не остануваат незабележани. Каде и да се појават оставаат впечаток, и најчесто е позитивен.
СТРЕЛЕЦ
Налик на лавовите, стрелците споделуваат слични модни карактеристики. Ентузијазмот, позитивната енергија и ведриот дух се нивните главни белези. Така е и со модата и стилот на облекување: стрелците сакаат бои (најмногу оние нијанси кои се јаки и интензивни), принтови (особено леопард принтот), но пред се’ сакаат внимание. Се забавуваат со се‘ што прават во животот, па и во комбинирањето на облеката.
ЈАРЕЦ
Оние кои се родени во овој знак ги сакаат сериозноста, мотивираноста и контролата. Само така се чувствуваат пријатно и на свој терен. Во тоа им помага и професионалната облека, која е на работ да биде конзервативна. Ретко излегуваат од рамките и ограничувањата кои си ги задале самите на себе. Црната, сивата и тегет сината се нивните бои, а доколку се одлучат за промени, тогаш со најмногу задоволство би ја додале и црвената боја, бидејќи ја покажува нивната скриена страст, наспроти студената надворешност.
ВОДОЛИЈА
И на најобичната комбинација мора да и дадат свој личен печат и да ја направат посебна. Секогаш изгледаат шик и средено, иако не ги следат трендовите. Не се потпираат на модните правила, туку испишуваат свои сопствени и цврсто се држат до нив, без оглед на тоа дали станува збор за облека за работа или, пак, излегување во ноќен клуб.
РИБИ
Завршниот збор и романтиката остануваат резервирани за припадничките на овој хороскопски знак. Исклучително чувствителни и нежни, рибите се романтични сонувачи кои што и да облечат изгледаат слатко и привлечно. Оваа сезона е во нивниот знак, бидејќи токму актуелниот боемски стил го одразува нивниот карактер. Цветните принтови, пастелните нијанси, многу белина и реси се заштитен знак за стилот на облекување, но и на комплетната личност на рибите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.