Daily news
Капитол мол го прослави 4. роденден
Вчера последен ден од роденската прослава на Капитол мол, кој прослави 4 години од отворањето. Веќе 4 години по ред Капитол мол е една од главните дестинации за добар шопинг и забава за сите генерации – од најмладите до најстарите. И покрај тоа што е прилично нов мол, во Капитол мол шопингот е само една од многуте можности кои ги нуди, а вреди да се споменат и фитнес-центарот опремен со најнови машини за вежбање, кугларница, одлична игротека, кафе, добра храна и супермаркет.
За време на детската програма беа вклучени многу активности за деца проследени со прекрасна музика. Помалите посетители имаа можност да се активираат во правење креативни роденденски честитки и во боење и цртање на роденденската торта на Капитол мол каде што беа придружени од уметниците Тоциновски, вклучени беа и многу семејни игри каде што семејствата имаа можност повторно да се обединат на едно место и да имаат незаборавни моменти.
Детската радост беше исполнета со годишното финале на ЛЕГО турнирот каде што доаѓа до израз и натпреварувачкиот дух, со присуство на аниматори, семејни игри, креирање роденденски честитки, но и роденденско караоке во игротеката Кидс парк со „Поточиња“. Овие активности резултираа со огромна среќа и насмевки кај најмалите. Радоста и возбудата беа зголемени со салса танчарите од „Академија рекреатива“, забавување со пантомимичари и куклено шоу. Идејата за одржување на овие точки беше да се запознаат децата со нешто поинакво за разлика од забавата која ја нудат сите електронски уреди. Целта на роденденската програма беше да се создаде среќа и насмевки кај најмалите во текот на целата роденденска прослава на Капитол мол.
Забавната програма беше наменета за сите возрасти. Главна тема на оваа програма беше музиката и танцувањето како симбол за веселба, така што центарот беше исполнет со забавната музика на диџеј Матс, настап на најпознатото танчарско студио во Скопје и пошироко – Беатрикс кру, чувствување на роденденската магија преку магионичарско шоу и со фантастичната музика на Кантри диџеј. Веселбата продолжи за време на викендот со музиката на диџеј Бранчез, настапот на Брас брадерс, како и приредување на детска ревија со Тила.
Поинаква точка беше приредена во понеделникот со поетската вечер кога беше презентиран поинаков поглед на целата прослава, со многу душа и уметнички елемент. И за крај, роденденската забава беше завршена со хуманитарниот настан „Од децата за децата“ кој беше специјално посветен за сите деца со посебни потреби, за заедничка дружба, ширење љубов и заедништво, како и класичниот музички концерт на училиштето „Кредо“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.