Daily news
Кинескиот заменик-министер Ванг на средба со Заев изрази поддршка за реформите и најави нови инвестиции
Претседателот на Владата на Република Македонија, Зоран Заев, придружуван од државниот секретар во МНР, Виктор Димовски, денеска се сретна со Чао Ванг, заменик-министер за надворешни работи на Народна Република Кина, придружуван од кинеска делегација и амбасадорката на НР Кина во Република Македонија, Јин Ликсиан.
„Република Македонија ќе постигне големи успеси со Владата предводена од Вас“, е оценката што ја пренесе кинескиот заменик-министер на надворешни работи, Ванг, на премиерот Заев.
Заменик-министерот за надворешни работи на НР Кина, Ванг, пренесе поддршка од неговата држава за реформските процеси што ги отвори новата Влада со цел подобар, квалитетен живот за граѓаните на Македонија.
„Ги цениме напорите на Македонија за реформите што ги прави, за продлабочувањето на соработката со земјите од соседството, како и за членство на Република Македонија во ЕУ“, рече кинескиот заменик-министер Ванг.
На средбата беше изразена заедничка определба за продлабочување на соработката помеѓу двете држави, како и натамошна меѓусебна поддршка.
Премерот Заев нагласи дека Владата на Република Македонија ги поддржува Форумот за меѓународна соработка „The Belt and Road“ одржан во Пекинг годинава, проектот 16+1, претстојниот Самит во Будимпешта во ноември и додаде дека НР Кина ќе има во иднина уште подобар партнер во Република Македонија, во економско-трговските релации.
– Покажавме дека наша цел е да се исполни во целост имплементацијата на двата автопатишта, Миладиновци – Штип и Кичево – Охрид, што ги гради кинеска компанија во соработка со домашни фирми. Во план е потпишување неколку меморандуми со уште неколку кинески компании што се присутни во регионот, во областа на енергетиката и железничкиот сообраќај. Тоа покажува дека ние во НР Кина гледаме голем економски партнер – рече премиерот Заев.
Договорена е обострана владина поддршка на бизнис-заедниците на двете земји, за засилена соработка во делот на економијата и трговијата, но и во други значајни области за граѓаните на двете земји.
Заменик-министерот Ванг соопшти дека кинески компании веќе се заинтересирани за инвестирање во Македонија, во делот на високата технологија, вложувања во индустриски паркови, како и во телекомуникациите, образованието, науката, туризмот.
– Целта на Владата е да отвори нови и подобро платени работни места, да ги мотивира младите да ја гледаат својата иднина во родната земја, а ваквите проекти можат само да придонесат кон тоа – додаде премиерот Заев.
На средбата е поздравено од двете страни традиционалното пријателство помеѓу Македонија и Кина и е договорена натамошна интензивна соработка, за што се оценува дека се создадени услови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.