Daily news
Коневски: СДСМ очајно се обидува да го прикрие скандалот со наставникот рекетар
„Со цел да го одвлече вниманието од објавениот скандал за рекетирањето што го спроведува Златко Марин во фирмите што работат на територијата на општина Аеродром, СДСМ ги злоупотребува институциите на власта и креира сценарија и обвиненија кои се чиста измислица. Последните анкети за рејтинзите на кандидатите за градоначалници што излегоа во јавноста изминатите неколку дена од медиумите блиски до СДСМ предизвикаа страв и очај во оваа партија. Станувајќи свесни дека безочното лажење не води кон победа, туку кон голем пораз, во паника на неколку дена пред изборите почнаа да манипулираат со измислени сценарија“, се вели во реакцијата на кандидатот за градоначалник на ВМРО-ДПМНЕ во Аеродром, Ивица Коневски.
Според него, штабот на СДСМ во Аеродром излегол со прес-конференција во добро познат стил преку негативна кампања измислувајќи ревизорски извештај од нафталин за наводни неправилности во работењето на ЈПССДП.
„Ревизорскиот извештај со кој излезе СДСМ на денешната прес-конференција, како што и сам тврди, се однесува за 2005 година кога со ЈПССДП стопанисуваше токму СДСМ, а јас на чело на оваа институција дојдов дури во 2007 година. Сите забелешки од овој ревизорски извештај се однесуваат на работењето на претпријатието во времето на СДСМ, што ми го оставија во наследство кога застанав на чело на ова ЈП, па морав да се справувам со последиците од нивното недомаќинско работење. Успеав да ја зголемам наплатата на деловниот простор дури 600 проценти и исто толку на кредитите за станбениот простор (а не 15 отсто, бројка со која манипулираат во СДСМ), воведов ИСО-стандарди за регулирање на процесите во работењето… Очигледно со извртување на вистината се обидува да го прикрие скандалот на наставникот по физичко, кој со месеци ги тероризирал фирмите во општината и од нив на најдрзок начин изнудувал пари за водење на својата црна кампања“, се вели во реакцијата.
Според Коневски, наместо да се обидува да фрла црна дамка врз работењето на Општина Аеродром, раководството на СДСМ треба да ги спореди ревизорските извештаи за Општина Аеродром со оние на општините Центар, Струмица, Куманово… каде што локалната власт со години беше и уште е во нивни раце.
„Општина Аеродром е пример за одговорно и економски стабилно работење. Нашата работа се разликува од нивната по тоа што ние сме транспарентни и отчетни за разлика од нивните манипулации и контроверзии. Но, граѓаните ги демаскираа и тоа ќе се докаже на 15 октомври. Омразата што ја сеат ќе си ја ожнеат на денот на локалните избори кога ќе се соочат со нивниот најголем пораз досега“, додава Коневски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.