Daily news
Кривична пријава за градоначалникот на Велес за злоупотреба на службената положба
Полицијата поднесе кривична пријава против градоначалникот на Велес, Славчо Чадиев, за злоупотреба на службената положба и овластување. Тој е осомничен за незаконско пренесување на правото на сопственост на недвижен имот од Општина Велес на Општина Чашка, кој веднаш го огласила за продажба со почетна цена 29.745.155 денари.
„Пријавениот С.Ч. (58) од Велес го сторил кривичното дело во периодот дури бил претседател на Советот на Општина Велес на тој начин што го прекршил Деловникот за работа на седница одржана на 11.7.2012 година. Претходно симнатата точка 6 од дневен ред, поднесена од градоначалникот на општина Чашка – предлог-одлука за пренесување на правото на сопственост на недвижен имот од Општина Велес на Општина Чашка, побарал по итна постапка повторно да биде вратена на дневен ред, без да ја образложи итноста, иако му било укажано за прекршување на член 61, став 4 од Деловникот за работа на Советот“, соопшти МВР.
Во соопштението се наведува дека Општина Велес била сопственик на недвижен имот – синдикално одморалиште во с. Горно Врановци, кое било градено со средства на поранешните претпријатија кои работеле на подрачјето на општина Велес, а е евидентиран во имотен лист за катастарска општина Горно Врановци. Во 2004 година од страна на Комисијата за приватизација на Република Македонија било донесено решение за преземање деловно средство, по што објектот бил преземен од Комисијата и доделен на стопанисување на Јавното претпријатие за стопанисување со станбен и деловен простор на Република Македонија. По судска постапка помеѓу Општина Велес и наведеното јавно претпријатие на 15.6.2012 година имотот се запишува повторно во сопственост на Општина Велес.
По само една недела од донесувањето одлука, од страна на Општина Чашка до Општина Велес било поднесено барање за донесување одлука за пренесување на правото на сопственост на недвижен имот од Општина Велес на Општина Чашка.
По доставени две ургенции од страна на Општина Чашка за наведеното барање, од страна на С.Ч. било ставено на дневен ред на 62. седница на Советот закажана за 11.7.2012 година и заведена под точка 6. Од страна на членовите на Советот присутни на седницата точката 6 била симната од дневен ред со гласање од 22 члена.
Спротивно на Деловникот за работа на Советот на Општина Велес, претседателот С.Ч. веднаш предложил по итна постапка поставување на дневен ред нова точка – предлог-одлука за пренесување на правото на сопственост на недвижен имот од Општина Велес на Општина Чашка.
„Притоа, членови на Советот на претседателот му укажале за свесното кршење на Деловникот. Занемерувајќи го мислењето на одредени членови и наведувајќи дека не се работи за истата точка затоа што сега предлагачот бил друг, тој дозволил расправа по таа точка, а подоцна и донесување одлука по неа. Одлуката во „Службен весник на Република Македонија“ била објавена на 16.7.2012 година“, се вели во МВР.
По донесената одлука за пренесување на правото на сопственост на синдикалното одморалиште во Горно Врановци од Општина Велес на Општина Чашка, Општина Чашка веднаш го огласиле за продажба со почетна цена 29.745.155 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.