Daily news
Кривична пријава за управничка на поранешна „Славија“, присвоила над 156.000 евра
Единицата за економски и компјутерски криминал на СВР Скопје поднесе кривична пријава против А.С. (64), поранешна управителка во „СЛАВИЈА“ ДОО Скопје, поради постоење основи на сомнение дека во периодот од 2007 до 2010 година сторила кривично дело „злоупотреба на службена положба и овластување“, со што го оштетила правното лице „СЛАВИЈА“ ДОО Скопје за вкупен износ од 20.771.204 денари.
А.С., која и претходно била кривично пријавувана за „злоупотреба на службената положба и овластување“, како управителка на правното лице, во периодот од 2007 и 2010 година, склучила договори со пет адвокатски кацеларии за пружање правни услуги со исплата на различен износ на месечен паушал. На тој начин овозможила исплата надвор од договорениот паушал во вкупен износ од 1.034.568 денари.
Исто така, пријавената признала и одобрила компензација на инвестициони вложувања од закупците во три објекти со стасаните месечни закупнини. Притоа, А.С. постапила спротивно на чл. 8 од склучените договори за закуп на деловен простор, според кој трошоците од инвестиционото вложување ги сноси самиот закупувач без право да ги компензира со стасаните закупнини и во ниту еден случај закупувачот по основ на какви било негови инвестиции, адаптации и други зафати не може да се стекне со сопственост или било кое друго право над објектот кој е под закуп. На тој начин пријавената го оштетила друштвото „СЛАВИЈА“ ДОО Скопје за износ од 2.914.199 денари.
Пријавената, во наведениот временски период, иако знаела дека сметката на СЛАВИЈА ДОО Скопје е блокирана, наместо да се грижи за одблокирање и да обезбеди услови за регуларно редовно работење на друштвото, постапувала спротивно на чл. 354 ст.3 од Закон за трговски друштва. Таа склучувала договори за цесија и асигнација со правните лица-закупувачи на деловен простор од „СЛАВИЈА“ ДОО Скопје и на тој начин овозможила прилив на 7.170.437 денари на сопствена сметка. Од извршена анализа на обезбедените податоци од банките во кои А.С. имала трансакциски сметки, утврдено било дека од вкупните приливи на нејзината сметка, во готово подигнала 2.393.000 денари, 4.202.000 денари биле подигнати од банкомати, додека 590.175 денари биле исплатени од нејзината трансакциска сметка на други правни лица за вршени набавки и користени услуги. На сметките на нејзино име во банките останале 232.956 денари.
Исто така, А.С. склучила купопродажен договор со кој извршила противправна продажба на деловен простор со површина од 111 метри квадратни и подрумски простор со површина од 20 метри квадратни, лоцирани во центарот на Скопје, во сопственост на СЛАВИЈА ДОО Скопје. Купопродажниот договор бил склучен во корист на правното лице „АЛЕКСАНДРИЈА“ ДООЕЛ Скопје при што не бил почитуван предвидениот износ на пазарна вредност на недвижниот имот, согласно проценката по Методологијата за утврдување на пазарна вредност на недвижен имот.
На тој начин пријавената го оштетила друштвото „СЛАВИЈА“ ДОО Скопје во вкупен износ од 9.652.000 денари или над 156.000 евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.