Daily news
Кривични пријави за фирмите што ги оставија без огревно дрво вработените во „Фени“
СВР Битола, НК за КР – ПС Прилеп до ОЈО Прилеп поднесе кривична пријава против шест физички лица И.К. (41) од Прилеп, Ј.Х. (34) од Крушево, Д.Б. (45) од Скопје, С.Д. (64) од Битола, Н.Д. (29) од Велес, Г.Н. (43) од Прилеп, како и против две правни лица „Прлица“ ДООЕЛ Прилеп и „Дејо интернационал“ ДООЕЛ Скопје, поради постоење основи на сомнение за сторено кривично дело перење пари предвидено и казниво по чл.273 од КЗ на РМ.
Од МВР информираат дека пријавениот И.К. во својство на прв основач и управител на фирмата „Прлица“ ДООЕЛ Прилеп, заедно со Ј.Х., сопственик на фирма што се занимава со трговија на огревно дрво од Крушево, во првиот квартал на оваа година склучиле договор за продажба на огревно дрво помеѓу фирмата „Прлица“ од Прилеп, како продавач, и синдикалната организација на „Фени индустри“ од Кавадарци, како купувач. Со договорот продавачот се обврзал да испорача 2.800 кубни метри дабови дрва од прва класа и 700 кубни метри бука прва класа, а купувачот се обврзал да плаќа редовно на шест еднакви месечни рати. Паричните средства за првите три рати, кои биле уплаќани на жиро-сметката на првопријавената фирма, веднаш биле извлекувани, паралелно со нивниот прием и без какво било реално покритие дека фирмата имала некакво работење. Фирмата немала никакво работење пред и по договорот со синдикалната организација на „Фени индустри“, немала никакви средства за работа, ниту склучени договори за набавка на огревно дрво.
Исто така, првопријавената фирма немала деловни односи со второпријавената фирма „Дејо интернационал“ од Скопје, преку која противправно биле извлечени паричните средства од втората рата извршена од синдикалната организација на „Фени индустри“ – Кавадарци. По исплатените три рати на сметка на ДООЕЛ „Прлица“ во висина од 3.650.000 денари, продавачот на 13 мај годинава го известил синдикатот на Фени дека не е во можност да ги обезбеди договорените количини огревни дрва.
Пријавените лица И.К., Ј.Х., како и Д.Б., сопственик на второпријавената фирма, Н.Д., управител во првопријавената фирма, Г.Н. во својство на книговодител на пријавените фирми, но и на фирмата од Крушево, и С.Д. пензионер што ја ставил својата лична трансакциска сметка во функција на противправните активности – имале цел со вршење трансакции да се извлечат паричните средства од сметката на „Прлица“ ДООЕЛ Прилеп (фирма што не е регистрирана за вршење таква дејност), а прибавени од договорот за набавка на огревни дрва и да се прикрие патот по нивното подигнување.
Од страна на „Фени индустри“ во ОЈО Велес поведен бил судски спор. Пријавените, секој во својот домен, примале и вршеле пренос на парични средства со цел да ги прикажат трнсакциите помеѓу себе како тековни активности на фирмата „Прлица“ ДООЕЛ Прилеп. На таков начин извлекле и противправно присвоиле парични средства во вкупен износ од 3.650.000 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.