Daily news
Кучиња од Македонија чувани во ужасни услови во Германија – активистите бараат реакција од надлежните служби
Асоцијацијата на активисти за права на животните (ААПЖ) бара од македонските надлежни служби да се инволвираат во случај што беше отворен во Германија, кога службата за ветеринарство и контрола на храна во Бергиш, на периферијата на Вупертал, во напуштен објект со ужасни услови, пронашла 54 кучиња и 3 мачки, од кои 33 кучиња биле од Македонија.
Како што наведуваат од ААПЖ, германскиот весник „Билд“ пренел ужасни фотографии направени на лице место, каде што се гледа дека животните биле чувани во услови под секое достоинство, а голем број од нив биле болни, изнемоштени и имале заразни болести, тумори и паразити.
„Бараме од Агенцијата за храна и ветеринарство да стапи во контакт со германските колеги за да се утврди дали станува збор за нелегален канал за ‘извоз’ на кучиња во Германија, кои се посредниците кои го овозможуваат ова и дали испраќањето животни од Македонија во други држави се прави во согласност со законските прописи“, велат од Асоцијацијата.
Оттаму доаваат дека секој кој одлучил дека на кучињата треба да им се бара дом во европските држави треба да биде осигуран дека животното е здраво, дека ќе се чува во соодветни услови и дека потоа истото ќе заврши во дом каде што ќе му биде пружена љубов, сигурност и безбедност.
„Разбираме дека на голем број улични кучиња и мачиња, особено оние со физички хендикеп, во Македонија не можат да им се најде соодветен дом. Со вакви случаи многупати сме се соочувале и ние, кога едноставно сме биле принудени да им бараме дом надвор од Македонија. Но, останува фактот дека за да се испрати едно животно надвор од државата, треба да бидеме стопроцентно сигурни дека животното ќе заврши во вистински раце, односно првично треба да се стапи во контакт со здружението во другата држава кое ги презема животните, да се провери преку повеќе канали дали тоа здружение работи според пропишаните закони и стандарди, а дури откако ќе се стекне доверба, да се премине кон процедурата на вдомување“, истакнуваат од Асоцијацијата на активисти за права на животните.
Велат дека со ваквото постапување на одредени поединци се докажало дека голем број животни се испраќаат во смрт.
„За да не доаѓа до вакви несакани настани во иднина, ги предупредуваме сите љубители на животни да внимаваат кому донираат пари за животни и да ја следат трагата на животните за кои донираат. Ги замолуваме сите оние кои донираат, тоа да го прават исклучиво преку официјално регистрирани здруженија во земјава, а не преку поединци“, стои во соопштението.
Од ААПЖ истакнуваат дека во меѓувреме очекуваат македонските служби да се вклучат во расчистувањето на овој случај за да не се дозволи повеќе животни од Македонија да се испраќаат надвор од државата за да умираат бавно, а некој од тоа да профитира.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.