Daily news
ЛШ: Сити го чека Наполи, Тотенхем на „Бернабеу“
Првиот ден од третото коло во Лигата на шампионите ги носи дуелите во Е-Х половината. Дерби средбите се играат во Манчестер, каде што Сити ќе го пречека Наполи, и во Мадрид каде што на Реал му гостува Тотенхем.
Три од четирите екипи (Ливерпул, Спартак, Марибор) во Е групата ќе се обидат да стигнат до премиерна победа во Лигата на шампионите. Севилја, која ја предводи групата ќе гостува во Москва кај Спартак со цел да освои најмалку бод и да ја задржи челната позиција, додека Ливерпул првиот триумф во сезоната ќе го бара во Марибор, кај истоимената екипа.
Група Е:
Марибор-Ливерпул
Спартак Москва-Севилја
Табела: Севилја 4, Ливерпул 2, Спартак 2, Марибор 1
Дербито на вечерта е во Манчестер, каде што ќе се сретнат Сити и Наполи, тимови кои веројатно во овој момент се наоѓаат во најдобра форма во Европа. Во сенка на овој меч ќе мине пресметката во Ротердам помеѓу Феенорд и Шахтјор.
Сити во саботата го декласира Стоук со 7:2 и се зацврсти на челната позиција во Премиер лигата.
„Ќе им покажам на моите играчи колку е добар нашиот противник. Тоа го направив пред дуелот со Шахтјор. Овие два тима играат слично, само што Наполи негува поофанзивен стил. Нападот е најдобра одбрана“, порачал менаџерот на Сити, Пеп Гвардиола.
Наполи е лидер во Серија А со максимален ефект од осум победи. Во саботата Наполи во дербито на колото ја победи Рома во Рим.
„Неверојатно е чувството во Рим да се забележат две победи во еден месец (Наполи претходно го победи и Лацио), но сега нашиот фокус е на Лигата на шампионите. Ние сме на почеток на нашата приказна…Играме против Сити, еден од најсилните тимови во Европа“, рекол капитенот на Наполи, Мерек Хамшик.
Група Ф:
Манчестер Сити-Наполи
Феенорд-Шахтјор
Табела: Манчестер Сити 6, Шахтјор 3, Наполи 3, Феенорд 0
Третото коло е веројатно клучно за минатосезонскиот полуфиналист Монако дали и оваа сезона ќе игра во нокаут рундата. Монако има еден бод по првите две кола, а вечерва ќе го пречека лидерот во групата Бешикташ. Порто, во оваа група, гостува кај дебитантот Лајпциг.
Група Г:
Монако-Бешикташ
Лајпциг-Порто
Табела: Бешикташ 6, Порто 3, Лајпциг 1, Монако 1
Реал по лошиот старт во новата сезона полека влегува во ритам, а вистински тест за можностите на тимот кој го предводи Зинедин Зидан е гостувањето на Тотенхем. Мечот е интересен и поради Герет Бејл, кој од Тотенхем пристигна во Реал, но неговиот настап е под знак прашалник бидејќи веќе две недели се мачи со повредата.
Тотенхем на овој меч ќе биде без двајца важни играчи, левиот бек Дени Роуз, кој е повреден, и Деле Али, кој е суспендиран.
„Кејн е клучниот играч на Тотенхем, многу е добар во сите сегменти, а најважно е што секогаш размислува како да постигне гол. Тој е комплетен играч, иако не изгледа така, но секогаш се појавува онаму каде што е потребно“, рекол тренерот на Реал, Зидан.
Група Х:
Реал Мадрид-Тотенхем
АПОЕЛ-Борусија-Дортмунд
Табела: Тотенхем 6, Реал 6, Борусија 0, АПОЕЛ 0
Натпреварите ќе почнат во стандардниот термин од 20:45 часот. н.ц.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.