Daily news
Македонија со месеци ќе нема амбасадор во Брисел
Брисел е загрижен од продолжувањето на политичките игри во Македонија, а во тие рамки и од очекувањето наредните неколку месеци нашата амбасада во ЕУ да остане обезглавена, т.е. без амбасадор.
Поради законските ограничувања за именувања пред локалните избори, извесно е дека Македонија ќе нема амбасадор во ЕУ до крајот на октомври, а во европските дипломатски кругови стравуваат дека тој рок ќе биде и подолг поради можноста опозицијата да го развлече именувањето на новиот кандидат преку Комисијата за надворешни работи во парламентот, каде што ВМРО-ДПМНЕ во моментот има повеќе пратеници од СДСМ или има ист број со коалиционите партии на СДСМ, но раководи со работата на ова тело.
Во ЕУ, генерално, постои скептицизам и за тоа колку е надмината политичката криза во земјата. Според дипломатски извор, Брисел сфаќа дека ова што се случува во парламентот е демократија, но несфатливо е и натаму да се нема чувство кога некое прашање е од национален интерес и да се избегнуваат политички игри за тоа.
Како што е познато, една од првите одлука на новата Влада предводена од СДСМ беше да ја прекине постапката за именување на Александар Николовски за шеф на мисијата на Македонија во Европската Унија бидејќи е високоекспониран политички кадар на ВМРО-ДПМНЕ и како таков не е посакуван ни од Брисел. Очекувањата на Николовски дека претседателот Ѓорге Иванов ќе стави потпис на неговите акредитиви и ќе влезе во конфликт со новата Влада се изјаловија, но можноста да се блокира именувањето на неговиот наследник останува реална.
Според неофицијални информации, шефот на државата се изјаснил дека ќе го поддржи секое именување амбасадори ако станува збор за професионални дипломати. Кој ќе го наследи Андреј Лепавцов на оваа функција засега не е сосема јасно, иако е логично веќе да се почнати подготовките, а по изборите да се формализира процедурата. Едно од имињата што се слушаше е тоа на Дејан Ѓоршоски, поранешен специјален преставник на Македонија во Брисел во времето на ВМРО-ДПМНЕ.
Во неформалните разговори исто така се навестува именувањето на Стево Пендаровски за амбасадор на Македонија во Вашингтон, САД, кој би го заменил Васко Наумовски бидејќи во Владата сметаат дека оваа амбасадорска позиција им е премногу клучна за да ја држи кадар именуван од ВМРО-ДПМНЕ. Инаку, Васко Наумовски е на половина од својот мандат во САД и е актуелен преговарач на Македонија за спорот за името. Појавувањето на Пендаровски на состанокот на Јадранската повелба со Мајкл Пенс, потпретседателот на САД, беше првиот сигнал дека се подготвува за таа функција.
Од француски извори се слуша исто така дека Париз би сакал за време на посетата на премиерот Зоран Заев на Франција, што веќе се подготвува, таму да ги пречека и амбасадор на Македонија. Оваа амбасада е празна поради спорот на Иванов со ДУИ, која не го признава како претседател на државата, а тој како реванш не ѝ ги потпишува именувањата. На листата за нови амбасадорски именувања е и амбасадата на Македонија во НАТО, каде што работата на актуелниот амбасадор Зоран Дабиќ се смета во алијансата како загубено време за евроинтеграцијата на Македонија. С.Ј.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.