Daily news
Македонски режисер работи со југословенската ѕвезда Петар Божовиќ
Со премиерната изведба на претставата „Ноќ”, во режија на македонскиот режисер Андреј Цветановски, а според текстот на црногорскиот писател Александар Радуновиќ, денеска во Кралскиот театар „Зетски дом“ во Подгорица ќе биде отворен фестивалот „МИТ 2017″.
Актерскиот ансамбл, кој го сочинуваат легендарниот српски актер Петар Божовиќ, како и Ана Вујошевиќ, Никола Перишиќ и Марко Тодоровиќ, на сцената ќе ја оживее приказната за едно семејство, сместена во една ноќ. Тоа е приказна за една љубов, растурена и изгубена, и за едно промашено време во животот.
„Приказната за растурање на семејството е локална, но исто така и светска тема. Радуновиќ напиша одличен текст. Ова е приказна за судирот на старата традиција и новото време, а во тој баланс се наоѓа уметноста на живеењето на Балканот. Како да се пронајдеме во тој раскол од она што било и што доаѓа. Имав можност да работам со еден од најголемите актери на Балканот, Петар Божовиќ, како и со помладите црногорски актери Никола Перишиќ, Ана Вујошевиќ и Марко Тодоровиќ”, вели Цветановски.
Авторот Александар Радуновиќ пред премиерата изјави: „Сигурен сум дека семејството, поточно она што значи да се расте и живее во таква заедница, во голема мера го одредува човекот, па не изненадува што многу великани на драмата од Есхил, Софокле и Еврипид, преку Шекспир и Молиер, до Ибзен, Чехов и многу други, се занимавале токму со феноменот на семејните врски. По сè, човечкиот воајерски импулс обично е насочен кон оние најинтимните и добро скриени настани во животот на еден човек, па се чини дека архетипските слики на врската: мајка-ќерка, татко и син, и обратно, во голема мера го одразуваат она што се случува на поширок план кога станува збор за меѓучовечки односи”.
Во претставата „Ноќ”, актерот Петар Божовиќ го толкува човекот кој е на умирање, кој создал имот, но и ја презел целата власт во семејството, со што се одалечил од своите деца. Неговата сопруга и двајцата синови, еден пијаница, а друг избеган од дома поради сексуалната ориентација се жртви на неговите грижи и посветеноста.
Драматург е Божо Копривица, сценограф Сергеј Светозарев, костимограф Лина Лековиќ, а музиката е на Рамбо Амадеус.
По отворањето на фестивалот „МИТ 2017″ (кој ќе трае до 28 септември) со претставата „Ноќ”, која ќе има и репризна изведба на 15 септември, следат претставите кои ја одбележаа театарската година во регионот. Публиката ќе ја види „Трудна приказна” на Театар комедија од Скопје, „Отело” и „Ладало” на Народен театар Битола, „Велика биљежница” на Загребачко казалиште младих, а сараевски МЕСС ќе се претстави со претставите „Кокош” и „What is Europe”, а ќе биде прикажан и европски театар преку италијанско-белгиска копродукција на „Антигона”. На ова издание на МИТ ќе бидат одржани три концерти: Стефан Миленковиќ ќе свири со Црногорскиот симфонијски оркестар, а ќе настапи и гитарското дуо Булатовиќ-Никчевиќ, како и Влатко Стефановски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.