Daily news
Медиуми: Во камионот со кој е извршен нападот во Стокхолм најден експлозив
Експлозив е пронајден во камионот со кој беше извршен нападот врз минувачи во петокот во центарот на шведската престолнина Стокхолм пренесе телевизијата SVT повикувајќи се на полициски извори.
Во петокот возач на украден камион кој припаѓал на компанијата „Spendrups“ косеше случајни минувачи на улица во центарот на Стокхолм минувајќи по неа 550 метри пред да се запре. Според официјалните податоци, 15 лица од кои неколку се деца, од кои девет се во тешка состојба, а четворица луѓе загинале.
Мажот осомничен за „убиства од терористички карактер“, уапсен по крвавиот напад со камионот, најверојатно го возел камионот, објави во саботата портпаролот на шведската полиција.
„Веруваме дека уапсениот маж е извршител на нападот“, изјавил полицискиот портпарол Ларс Бистром.
Шведските медиуми објавија дека станува збор за 39-годишен Узбекистанец, симпатизер на џихадистичката организација Исламска држава. Тој е сместен во притвор во Стокхолм, ден по нападот, откако во петокот вечерта бил уапсен во гратчето Марсти, на северот од стокхолмската агломерација, пишува весникот Aftonbladet.
Уште еден маж е приведен подоцна во текот на ноќта во предградие на Стокхолм. Полициските извори на кои се повикува јавниот телевизиски сервис SVT наведуваат за можна поврзаност меѓу двајцата приведени мажи.
Камионот насочен во центарот на главниот град на Шведска кој удира во минувачите и зад себе остава осакатени тела потсетува на нападите во Ница, Берлин и Лондон, за кои одговорноста ја презема Исламската држава. За нападот во Стокхолм засега никој не ја презема одговорноста.
„Шведска е нападната. Сите сознанија упатуваат на атентат“, изјави шведскиот премиер Стефен Лофвен кој идно се врати во Стокхолм во петокот вечерта и го посети местото на трагедијата полагајќи букет рози.
Кога станува збор за истрагата, полицијата објавува минимални информации, но обвинителството во саботата рано утрото објави дека е притворен маж осомничен за „терористички убиства“, изјавила портпаролката Карин Росандер. Шведскиот код на кривична постапка предвидува повеќе степени на сомневања, па мажот се испитува во највисок степен на осомниченост, додала.
Обвинителството не изнесува поединости за неговиот идентитет, но според медиумите описот одговара на лицето снимено на самото место во времето на нападот, облечено во јакна со црна качулка по коешто е издадена потерница.
Во Шведска досега е изведен само еден терористички атентат, кога во 2010 година маж изведе самоубиствен бомбаши напад на пешачка улица, исто така, во Стокхолм, Тогаш само полесно беа повредени минувачи./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.