Daily news
Микела Магеш за Макфакс: Успехот е 99 проценти напорна работа, а еден процент добра идеја
Разговараше Бојан Стојковски
Успехот секогаш се состои од 99 проценти напорна работа, а еден процент добра идеја, вели за Макфакс Микела Магеш, еден од клучните говорници на конференцијата „Next Generation“, која во организација на Сеавус и Сеавус инкубатор се одржа во средата во Скопје, посветена на иновациите, технологијата и стартапите.
Магеш е добитничка на двете најпрестижни награди на ниво на Европската Унија, и тоа во 2017 година е прогласена за „Жена иноватор на годината“, а во 2016 година е добитник на „Наградата Луминари за креативна иновација“, чиишто претходни добитници се професорот Стивен Хокинг и Ричард Брансон.
„Оваа наградата, како и другата, односно таа за ‘Жена иноватор’ се доста важни поради повеќе причини, пред сè поради тоа што жените вообичаено не се сметаат како фактори во бизнисот и не се сметаат за иновативатни умови, секако не толку често како мажите. Сметам дека е доста значајно да се добие тоа признание, но сметам дека и двете награди ги делам со нашата заедница од над пет илјади иноватори и дека придонесувам кон градењето страна на тој простор, и повеќе се чувствувам како нивен претставник, некој кој ги претставува нивните интереси и кој може да ги претставува другите жени во бизнисот итн.“, објаснува Магеш за Макфакс.
Вели дека и во Македонија забележала слични ставови и принципи на работа како и оние кои ги применува нејзината компанија. „Можам да забележам дека и овде има слични ставови и принципи како и нашите и дека тие веќе се применуваат, во Сеавус инкубаторот и во СЕДЦ, кои ја користат креативната иновација како стимул за да ги вклучат децата да работат со роботика, програмирање и решавање проблеми, а младите луѓе тука се учат да работат со стартапи како што тоа го правиме и ние. Она што сакам да го правам е да најдам заедници кои имаат сличен начин на размислување и да ги обединам со нашата интернационална заедница“, смета Магеш.
Инспирацијата ја црпи од луѓето, а не од патувања, иако тие се голем дел од нејзиниот живот, бидејќи постојано е во движење. „Највеќе ме инспирираат луѓето, и не се работи за тоа дека треба да патувам наоколу и да барам инспирација. Повеќе се работи околу тоа да запознавате фантастични луѓе, како на пример луѓето што ги запознав тука, и тие се мојата најголема инспирација, но исто така и фактот што можеме да се наоѓаме на различни локации, на пример нашиот менаџмент се наоѓа во многу различни градови и секој од нас може да го култивира локалниот екосистем, што значи дека имаме многу поголеми заедници кои редовно учествуваат во донесувањето на одлуките“, вели Магеш во интервју за Макфакс./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.