Daily news
МОБ ќе ја отвори новата сезона со балетскиот спектакл Клеопатра
МОБ новата сезона ќе ја отвори со балетскиот спектакл Клеопатра на 27 септември во 20 часот . зборот за оваа претстава доаѓа токму во консултација со публиката и статистиката. Клеопатра е најизведувана и најпосетена претстава од репертоарот на МОБ, во текот на една сезона. Во изминатата сезона оваа претстава е изведена 12 пати и ја погледнале повеќе од 8.500 посетители, информираат од МОБ.
Како во изминатата сезона, така и оваа, МОБ во својата програма вклучува неколку премиери. Македонската публика ќе има можност на 18 октомври да присуствува на првата премиера во новата сезона. Се работи за триптих, изведба на три балетски дела и тоа, СОФА и НЕКОИ СРЦА, во кореографија на светскиот кореограф Ицик Галили од Израел, а на музика од Том Ватс и Филип Глас. Третата претстава е обнова на ПЕСНА НАД ПЕСНИТЕ (Лудница) во кореографија на Сташа Зуровац, а на музика на Маријан Нечак.
За месец октомври е закажана и првата оперска премиера во новата сезона, на 31.10.2017 во 20 часот премиерно ќе бидат изведени претставите Кавелерија Рустика на Пиетро Маскањи и Паљачи од Руџеро Лоенкавало. Се работи за оперски дела во еден чин, дел од класичниот репертоар на секоја оперска куќа во светот и за таа цел се поставуваат и на сцената на МОБ.
До крајот на оваа календарска година, во тековниот репертоар на сцената на МОБ, ќе бидат изведени балетските претстави Дон Кихот, Дамата со камелии, Лебедово езеро и Бурнонвил, додека од оперските претстави, публиката ќе може да ги погледне Тоска, Набуко, Травијата, Евгениј Онегин и Лилјакот. За изведбите од тековниот репертоар, МОБ ќе продолжи да кани имиња од светската оперска и балетска сцена, со цел доближување на квалитетот до публиката.
За 2018 година, во предлог програмата се ставени три оперски и три балетски премиери и тоа, обнова на Кармен од Жорж Бизе, премиера на операта Шение од Умберто Џордано и Џани Скики од Џакомо Пучини. Балетот во 2018 прославува 70 години од своето основање при МОБ, и по тој повод ќе се организира голема европска балетска конференција на која балетот при МОБ ќе биде домаќин, а воедно ќе бидат поставени премиерно и балетите Божествена комедија и балетот Ромео и Јулија.
Во насока на збогатување на програмата, МОБ и натаму ќе го организира детскиот викенд, што претставува изведба на детски оперски и балетски претстави во викенд термините. Дополнително програмата ќе биде збогатена и со алтернативната сцена, со цел развивање на истата преку поддршка од страна на куќата, а во насока на создавање нови и квалитетни оперски гласови и балетски кореографи.
Македонската опера и балет првото полугодие од 2017 година го заврши на 24 јуни со моцартовиот Реквием. Потоа, следеа гостувања на балетот во Пловдив – Бугарија, Охрид – Македонија и Сплит – Хрватска. Со тоа се заврши програмата на МОБ за сезоната 2016/2017 година. МОБ во првото полугодие од 2017 година ја посетија повеќе од 25.000 посетители на 76 претстави. Со тоа се остварија зацртаните цели на куќата, да достигне 50.000 публика како и да бидат изведени 150 претстави по сезона, информираат од МОБ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.