Daily news
Горан Марковиќ: Во филмовите на Вуди Ален сите играат како него
За актерската игра на филм, особено онаа во крупен план, шармантно и прецизно пладнево во Кинотеката во рамките на филмскиот фестивал „Киненова“ зборуваше режисерот Горан Марковиќ. Како потписник на многубројни значајни филмски остварувања во поранешната југословенска и српска кинематографија и син на големите актерски имиња Оливера и Раде Марковиќ, режисерот пред љубителите на филмската уметност со големо задоволство пренесе дел од своето обемно искуство.
Човекот чии филмови „Вариола вера“, „Веќе видено“, „Оптимисти“ и многу други длабоко се вовлекуваат во меморијата на гледачот и во кои доминира морбидна емоција карактеристична за хорор и трилер-филмот и си поигрува со мрачни психолошки мотиви, смета дека во работата со актерите најважно е да се биде транспарентен.
„Режисерот не треба да му каже на актерот како нешто да одигра, туку како не треба. Во самите подготовки речиси сѐ е расчистено, па кога се случува самото снимање, актерот е всушност пред камерата и пред режисерот ставен пред публиката. Според мене, најважна е емоцијата што некој се обидува да ја скрие. Таа се насетува, надвор од таа игра, која е клише – тага, радост, ужас. Трпението и почитта кон актерот од страна на режисерот е исто така многу значајна“.
Имал разни искуства со разни актери. Во филмот „Веќе видено“, каде што првпат на филм се појавува Аница Добра, но и веќе искусниот Мустафа Надаревиќ, Марковиќ морал да применува различен пристап.
„Во ‘Веќе видено’, Добра имаше потреба да ги вежба репликите и по 15 пати, а Надаревиќ сакаше да ги снима од првпат. Тогаш како режисер морав да бидам и партнер за вежбање на актерката пред тие двајцата да се спојат за снимање на сцената. Големото искуство ми покажало дека секој актер може сам да ја креира улогата откако добро ќе се договори со режисерот. Сепак, секогаш најважна е велам онаа емоција што секој се обидува да ја скрие. Практично, гледачот е тој што минува низ сцените, се препознава и на некој начин тој треба да се чувствува како креатор на филмот. Тоа е тешка задача за режисерот“.
Актерите ставени во крупен план, според Марковиќ, се ставаат само ако нема некоја јасна емоција.
„Сметам дека е глупаво ако некој треба да одигра тага од лична трагична загуба на пример, неговите солзи да бидат снимени во крупен план. Истото важи и за секоја друга јасна емотивна состојба. Овие кадри во крупен план се применуваат повеќе за т.н. празни емоции. во кои преку очите на актерот треба да се доближи некоја негова скриена мисла. Не ги сакам оние режисери што на актерите им кажуваат како треба да играат. Во филмовите на Вуди Ален речиси сите играат како него и всушност гледате десетина лика, а сите се Ален“.
Марковиќ работилницата ја одржа во рамките на филмскиот фестивал „Киненова“ каде што и преседава со жирито што ќе ги додели годинашните награди. (А.В)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.