Daily news
Нешта кои предизвикуваат конфузија во мозокот
Мозокот се буни при помислата на четиридимензионални објекти, бескрајноста на вселената и квантната механика. Веројатно тоа е и нормално.
Но, сивата супстанција генерално нема проблеми со обработката на сетилата за информации од секојдневните објекти и искуства, со некои исклучоци. „Live Science“ наведува пет нешта кои го збунуваат мозокот.
1. ВРАТИТЕ
Дали некогаш ви се случило да влезете во собата со одредена цел (на пример за да земете нешто) и одеднаш да заборавите зошто сте таму? Обвинението паѓа на вратите.
Психолозите откриваат дека преминот низ врати предизвикува своевидна „граница“ во умот, двои еден ред на мисли од следните, со тоа што излегувањето од собата го сигнализира крајот на филмската сцена. Мозокот ги собира мислите од првата соба и отвора нова страница за информациите од следната локација. Таквите своевидни граници обично помагаат да ги организираме мислите и спомените, но кога ќе влеземе во собата и се чудиме зошто сме тргнале, ефектот е сосема спротивен.
2. ЗВУЦИТЕ
Што ве иритира најмногу? Утринскиот аларм, свирките во уличниот метеж или било кој од многуте уреди што сигнализираат дека им завршува батеријата? Сите се подеднакво ужасни. Овие „бип“ звуци се всушност саундтракот на модерниот свет, но мозокот тешко ги обработува.
Нашиот развој е придружен со слични звуци и ние се трудиме да ги разбереме. Сигналите се како автомобил кој вози со 100 км/ч кој одеднаш се удира во ѕид, наместо полека да ја намали брзината. Овој звук не се менува со времето, не се повлекува, а нашиот мозок се труди да погоди што е и од каде доаѓа.
3. ФОТОГРАФИИТЕ
За време на еволуцијата не само што не сме слушале аларми, туку не сме гледале ни фотографии. Како што бабите можат да се навикнат на современите технолошки достигнувања, но не можат да развијат интуција кон нив, така ние свесно ги разбираме фотографиите, но потсвеста не може целосно да ги оддели луѓето и предметите кои се на нив.
Бројни истражувања покажуваат дека луѓето се многу попрецизни кога играат пикадо врз сликата на Хитлер, отколку по слики на Кенеди. Друго истражување покажува дека многу луѓе почнуваат да се потат кога ќе побараат од нив да ги уништат нивните омилени фотографии од детството. Без милионите години пракса, тешко е да ја одвоиме сликата од реалноста.
4. ТЕЛЕФОНИТЕ
Дали некогаш ви се случило да почувствувате како телефонот вибрира во џебот или чантата, само за да го погледнете и да видите празен екран. Ако чувствуваме често такви лажни вибрации, причината е тоа што мозокот доаѓа до погрешни заклучоци во обид да го систематизира хаосот од детали кои го опкружуваат.
Бомбардирани сме од сетилни податоци, а мозокот треба да филтрира бескорисна бучава и да ги регистрира само најважните сигнали. Со денешниот техноцентричен став нашиот мозок може да интерпретира сè, од шушкање на облеката до кркорење на желудникот, како сигнал дека добиваме повик или порака.
5. ТРКАЛА
Дали сте забележале како тркалата се движат наопаку во филмовите? Тоа е затоа што камерите снимаат ограничен број кадри во една сцена, а мозокот ги исполнува празнините помеѓу нив, создавајќи илузија за продолжено движење. Помеѓу една и следната рамка тркалото направило повеќе од еден круг, па затоа изгледа дека тоа се врти наназад.
Слична илузија се случува и во реалноста. Една од теориите ја објаснува со тоа дека мозокот го гледа движењето како серија од снимки, како кај камерите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.