Daily news
Николовски: Искористувањето на ИПАРД-програмите e најдобар начин за приближување до европското земјоделство
Министерот за земјоделство, шумарство и водостопанство, Љупчо Николовски, денеска во Охрид присуствуваше на работилницата за имплементација на ИПАРД-програмите, на која беа и првите луѓе од Генералниот директорат за земјоделство и рурален развој на Европската Унија (DG Agri) и од Постојаната работна група за регионален рурален развој – SWG, како и директори и претставници на платежните агенции од Хрватска, Турција, Црна Гора, Србија, Албанија и од Косово.
Како што информираат од Министерството, претставниците од платежните агенции на работилницата ги презентирале своите искуства во користењето на европските фондови, проблемите со кои се соочуваат, но изнеле и предлози за поефикасна искористеност на ИПАРД-програмите.
Министерот Николовски ги посочил искуствата на Република Македонија во користењето на европските фондови потенцирајќи дека се направени анализи, детектирани се слабостите и веќе се адресираат за решавање со цел да не се повторат истите грешки и во искористувањето на ИПАРД II.
„Едно од горливите прашања во ИПАРД е соодветната екипираност на надлежните институции, односно на Платежната агенција и на телото за управување со ИПАРД. Владата на Република Македонија го детектира овој проблем и веќе во тек е процесот за првите нови вработувања и нивната кадровска екипираност.
Пред Платежната агенција и пред Министерството за земјоделство, шумарство и водостопанство стои голем предизвик со реализација на ИПАРД II. На првиот јавен повик од ИПАРД-програмата 2014-2020, кој беше реализиран лани, имаме рекордно голем број добиени барања за кофинансирање од ИПАРД. Пристигнати се 1.649 барања и побарани над 55 милиони евра за кофинансирање, а целата ИПАРД-програма 2014-2020, која може да се користи до 2023 година, изнесува 60 милиони евра. Пред нас е предизвикот да се обработат сите барања и да се потпишаат договори со корисниците и оваа година да имаме исплати за што Платежната агенција прави големи напори за да се забрза овој процес“, изјавил министерот Николовски.
Воедно, министерот потенцирал дека Владата континуирано ќе преземама мерки што ќе го помагаат процесот на поголема искористеност.
„Еден од проблемите со кој се соочуваат потенцијалните корисници на ИПАРД-програмите е недостиг на средства за реализација на инвестицијата и затоа Министерството за земјоделство, шумарство и водостопанство во соработка со другите институции забрзано работи на воспоставување механизам, односно гарантен фонд, кој би овозможил предфинансирање не само за ИПАРД-програмите, но и за генерирани инвестиции во агробизнис-секторот“, рекол Николовски.
Исто така, министерот Николовски, денеска остварил и работен состанок со првите луѓе од Генералниот директорат за земјоделство и рурален развој на Европската Унија (DG Agri), на кој се разговарало за статусот и динамиката на примените апликации на последниот повик за ИПАРД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.