Daily news
Обезбедени 5,4 милиони швајцарски франци за рамномерен регионален развој
Со потпишување меморандум во Владата на Република Македонија од страна на вицепремиерот за економски прашања, г. Кочо Анѓушев, министерот за локална самоуправа, г. Сухејл Фазлиу, и амбасадорката на Швајцарија во Република Македонија, Сибил Сутер Техада, почнува имплементацијата на нов проект за поттикнување на рамномерниот регионален развој во државата во вредност од 5,4 милиони швајцарски франци.
Повеќето од средствата, 3,6 милиони, ги обезбедува владата на Швајцарија, а 1,74 милион швајцарски франци Владата на Република Македонија.
Вицепремиерот за економски прашања, Анѓушев, истакна дека меморандумот ја покажува посветеноста на Владата за поголема поддршка на рамномерниот регионален развој.
– Со спроведување на меморандумот за разбирање очекуваме пред сè да постигнеме повисоко ниво на транспарентност и преглед на средствaта што се распределуваат преку владините програми за имплементација на проекти, а со тоа да добиеме и јасна слика колку средства во кој регион се вложуваат, што ќе придонесе кон идни чекори и планирање на средствата за рамномерен регионален развој – рече вицепремиерот Анѓушев.
Потпретседателот на Владата, Анѓушев, појасни дека меморандумот содржи три компоненти и појасни како ќе се искористат средствата наменети за меморандумот.
Со имплементацијата на првата компонента, во вредност од 1,7 милион швајцарски франци, ќе се лоцираат и спроведуваат фондови за рамномерен регионален развој на транспарентен и предвидлив начин во согласност со степенот на развој на планските региони. Со тоа ќе се работи на унапредување на административната, законодавната и финансиската рамка во областа рамномерен регионален развој. Со оваа компонента ќе се воспостави систем за подобра координација, планирање, спроведување и мониторинг на средствата наменети за оваа област.
Со втората компонента во вредност од 600 илјади швајцарски франци ќе се опфатат активности што ќе придонесат за тоа потребите и барањата на граѓаните, вклучително и на ранливите категории граѓани, систематски да бидат вклучени од страна на регионалните совети во процесот на планирање на регионалниот развој.
Третата компонента во вредност од 2,7 милиона швајцарски франци директно ќе влијае на подобрување на работата на центрите за регионален развој во сите осум плански региони, особено во помалку рзвиените, за да ја подобрат својата ефикасност и ефективност. Преку оваа компонента ќе се поддржи креирање и спроведување проекти од поголем обем и иновативни проекти.
Амбасадорката на Швајцарија, г-ѓа Сутер Техада, истакна дека швајцарската влада ја поддржува политиката на рамномерен регионален развој во Република Македонија од 2012 година и дека нема да застанат овде.
– Темелите се поставени, но ние не смееме да застанеме тука. Она што ни треба денес е политика што целосно го мобилизира потенцијалот на планските региони и го поттикнува нивниот развој. Денешните региони мора да размислуваат за тоа како да станат конкурентни играчи на глобалниот пазар, а најуспешни се оние што успеале да ги интернационализираат своите економии. Покрај натамошното зајакнување на капацитетите на институциите одговорни за регионалната политика, неопходно е алоцирање на буџетските средства според нивото на развој на планските региони. Потребни се поголема транспарентност, одговорност и учество на граѓаните во планирањето и спроведувањето на регионалниот развој – рече амбасадорката Сутер Техада.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.