Daily news
Богдан Илиевски – Бетмен: Нема да го поддржам денешниот протест на „Тврдокорните“
Богдан Илиевски – Бетмен изјави за „Макфакс“ изјави дека нема да го поддржи вечерашниот протест на „Тврдокорните“ затоа што не се согласува со одредени елементи на организација на протестот, иако неговиот став е категоричен против, како што вели, неуставниот закон за албанскиот јазик.
„Денеска повторно имаме ‘тврдокорен’ протест со пароли во кои има некои елементи со кои јас лично не се согласувам, па затоа и нема да го поддржам, иако сум против неуставниот закон за двојазичност, а максимално го поддржувам демократското право на протест. Инаку, човечки е секој да се активира во даден момент кога молчењето ќе стане неприродно, додека енергијата против погубните политики на власта само се зголемува. Протестите се секогаш добри како демократска алатка за практицирање на уставно гарантираните права на секој поединец во државата, а во едни вакви услови се и повеќе од добредојдени сè додека се во рамките на демократските вредности“, изјави Богдан Илиевски-Бетмен за „Макфакс“.
На прашањето зошто протестот се организира пред штабот на ВМРО-ДПМНЕ, за Илиевски пологично било, сепак, протестот да биде пред СДСМ.
„Пологично би било да протестираат пред штабот на СДСМ, кој е моторот за носење на овој противуставен закон за двојазичност. Или очекуваат некаква акција од ВМРО-ДПМНЕ или некој ги насочил. Злите јазици можеби би заклучиле и дека протестот кој на социјалните медиуми се шири како ‘Стоп за двојазичност и албанизација на Македонија’ е намерно закажан да почне пред централниот штаб на ВМРО-ДПМНЕ за да се продолжи со лепење на етикетите кон ВМРО-ДПМНЕ, меѓутоа сограѓаните Албанци се доволно зрели за да знаат кога, кој и со каква цел би сакал да ги манипулира и мислам дека нема да наседнат на ваквите провокативни декларации кои можеби би резултирале со манипулации како што се случуваше на протестите ‘За заедничка Македонија’. На крајот на краиштата, луѓето може да протестираат каде што сакаат сè додека не ги попречуваат туѓите права и слободи. Иако во конкретниот случај темата им е речиси погодена, адресата е погрешна. ВМРО-ДПМНЕ во Собранието се бори против неуставниот закон, во рамките на делегираните права од повеќе од 456.000 гласачи во Република Македонија“, изјави Илиевски.
Илиевски не даде конкретен одговор дали иницијативата за заедничка Македонија ќе се организира со протести и слични активности.
„За заедничка Македонија“ се роди како реакција на подметнувањето платформа создадена во туѓа држава да ги креира политиките во нашата држава, и ги застапуваше идеите против бинационална и двојазична држава во која нема ни уставни ни логични предиспозиции за двојазичност на целата територија, а тоа значи дека со форсирање на вакви закони наместо да се придонесува кон соживотот, се создава атмосфера на наметнување нелогична легислатива. Двојазичноста беше само еден аспект кој го разбуди револтот на граѓаните, тука е и дебатата за ново име, знаме, химна, па обвинувањата кон сите граѓани на Македонија дека биле геноциден народ и ред други работи зготвени во туѓа кујна“ , додаде Илиевски.
Кристијан Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.