Daily news
Од Австралија до Европа: Плажи на смртта
Од Австралија до Европа земјината топка е полна со скриени места каде хармонијата на морето и копното е неверојатна. Ни го одземаат здивот и само сакаме да се капеме и сончаме. Сепак, некои од нив колку и да се убави, во себе кријат тајни опасности.
Њу Смирни ја сакаат луѓе, но и ајкулите.
Оваа плажа, која се наоѓа во американската држава Флорида, е многу убава и популарна, но колку што ја сакаат луѓето, толку ги привлекува ајкулите. Поради честите напади на ајкули прогласена е за една од најопасните на светот. Дури 15 отсто од вкупните напади на ајкули врз луѓе во 2007 година се случиле токму на таа плажа. Но, ајкулите не се единствени „чудовишта“ кои се опасност од морските длабочини.
Смрт од отровни медузи во рок од две до пет минути
Во Квинленд, Австралија, постои плажа што се вика Кејп Триблејшн. Таму освен ретки посети на крокодили и змии отровници, од самата вода има опасност од отровни медузи. Тешко се забележуваат поради проѕирниот изглед, а кога ќе го „испржат“ човекот, жртвата може да умре од две до пет минути по допирот.
Опасни морски струии: Се удавиле 83 луѓе
Освен ајкули и медузи, закана за безбедноста на човекот на море често се и морските струи. Морските струи на плажа на Ханакапиаи на Хаваите толку многу се непостојани што можат да го измамат и најискусниот пливач. Поради влијанието на струјата во околината на плажата, наводно се удавиле 83 луѓе, иако локалните весници бројат 30.
Остров на средбите
Плажата на островот Реунинон е позната по напади на ајкули. Се работи за француска територија одалечена 225 километри од Маурициус во Индискиот Океан. Од 2011 година тука се забележани 20 смртни напади на ајкули, што е 13 отсто од сите напади во светот.
Гансбаи, Јужна Африка
Овој дел од светот е царството на големата бела ајкула. Неколку километри од брегот се наоѓа преминот наречен Пат на ајкулите, кој е дом на голем број фоки, но и ајкули, кои доаѓаат да се гостат. Освен ако и самите не сакате да бидете нивни оброк, ова подрачје мора да го избегнувате.
Чаупети, Индија
Ова подрачје е меѓу најзагадените во светот. Капењето во тие води не се препорачува, иако локалното население тоа редовно го прави, со тоа што на луѓето од Западот таму им се закануваат сериозни болести.
Плажа Амазон, Бразил
Веслањето во Амазон значи дека просторот ќе го делите со пирани, анаконди и електрични јагули. Подобро држете се до брегот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.