Daily news
Од Собранието ме изнесоа маскиран како повреден полицаец, рече Села
Откако се разбудил од бессознание, дента на 27 април пратеникот Зијадин Села го здогледал Абдулфетах Алими од Собранието. „Ме сместија под едно биро. Со Алими беше и друго лице кое штом почна да влегува полицијата ми рече ‘ако те прашаат кој сум, кажи им дека ти помагам’. Сигурен сум дека тој беше од толпата, ама ми помагаше“, продолжи Села со сведочењето потсетувајќи се настаните во Собранието на 27 април. Тој веднаш се јавил кај неговата сопруга да ѝ соопшти дека е жив, а на полицајците кои влегле во просторијата им кажал дека лицето до него му помагало.
„Ми облекоа дуксер од човекот кој беше во собата и ми дадоа полициска значка. Ме маскираа како повреден полицаец и почнаа да викаат ‘повреден полицаец, повреден полицаец!’ Ме маскираа за да не ме познаат“, се сеќава Села. Ексминистерот за здравство, Никола Тодоров, побарал да го префрлат во Градската болница, но лекарот кој бил во комуникација со неговиот сопартиец Арбен Таравари одлучил да го однесат на Клиничкиот центар.
„Тодоров реагираше нервозно и рече ‘правете што сакате’, па замина. Ме ставија, колку што се сеќавам, во хермелин. Ме однесоа на КАРИЛ. Поради хеморагијата бев во животна опасност и не се знаеше дали ќе преживеам“, раскажа Села. Села се потсети и за една, како што ја нарече, наводна новинарка, која цело време го снимала во лицето.
„Разговараше на телефон, покажуваше кон мене и нешто се договараше. Пред да се случи упадот, таа ме следеше, излезе напред и рече ‘никаде нема да одите, сега ќе видите што ќе ви се случи’. Мене не ми дозволува културата да фатам жена и да ја тргнам. Во тој момент се вративме и влеговме во прес-салата. Таа цело време ме следеше со едно лице со фантомка и разговараа гледајќи кон мене“, раскажа Села.
Кога неговиот 8-годишен син ја чул веста ја прашал мајка си ‘што му се случува на тато?’, рече Села и додаде дека и ден денес прима терапија.
„Хеморагијата се повлекува, но била во епилептогена зона. Одвреме-навреме сè уште имам главоболки“, сведочеше Села.
Во кривичниот суд денеска продолжи рочиштето за напаѓачите на пратеникот Зијадин Села. На обвинителната клупа повторно седнаа обвинетите Оливер Ошавковски, Сашо Сенков, Николче Димитриевски, Александар Јаневски-Тошта, Андреј Мицов, Никола Војминовски, Коста Делов, Стојан Павлески – Кобра, како и Кире Ѓоргиевски и неговиот татко. Последните двајца беа уапсени во мај минатата година, како осомничени за физички напад и влечење на Села, кој потоа во критична состојба заврши во болница.
В. М.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.