Daily news
Оливер Андонов го демантира Заев, не тужел само се жалел
Оливер Андонов, поранешниот директор на Јавното претпријатие „Јасен“, реагираше на изјавата на премиерот Зоран Заев во интервјуто на 24 Вести дека тој покренал постапка за неговото разрешување, но го изгубил спорот пред суд.
„Во наведената емисија, во врска со поставеното прашање за незаконското разрешување од страна на владата на СДС на поголем број функционери или директори на институции и јавни претпријатија кои се случија во последниот период, а особено по распишувањето на локалните избори, господинот Заев изјави дека „…директорот на Јасен го изгуби спорот пред суд, тој беше меѓу првите, тужеше и го изгуби спорот пред суд . . .“ и со тоа се потврдило дека владата на СДС работела правилно, односно не направила прекршување на законите во врска со смената на функционерите и раководителите.
Со целосниот мој личен и професионален кредибилитет под целосна материјална и кривична одговорност, а особено морална пред граѓаните на Македонија, тврдам дека до денеска како поранешен в.д. директор на ЈП УЗПП „Јасен“ немам поведено ниту водено никаква судска постапка против ЈП УЗПП „Јасен“ или, пак, против Владата на Македонија, а не, пак, некаков судски спор кој наведно според него сум го изгубил. Едноставно кажано, не може да се изгуби судски спор кој не е ниту покренат.
На мислење сум дека господинот Заев, со цел да ги оправда противзаконските дејствија на владата на СДС во однос на смените што ги направи во институциите и јавните претпријатија, го зема директорот на ЈП „Јасен“ како пример за наводно законско работење на неговата влада во однос на видливите противзаконски разрешувања и еклатантното кршење на законите, статутите и деловниците за работа во институциите и јавните претпријатија.
Јас му препорачувам на господинот Заев пред да излезе во јавноста и отстапи од обид за јавна манипулација на граѓаните преку кажувања невистини, да побара од службите што му стојат на располагање (партиски на СДС или владини) појаснување за тоа што е судска постапка, а што приговор до Комисијата за спречување корупција и како и врз основа на што самата Комисија одлучува, а како се одлучува во судска постапка.
Не доликува господинот Заев, од позицијата од која настапува во јавноста и преку која се обидува да се идентификува и покаже „авторитет“ , да не им ја кажува вистината на граѓаните, туку при своите јавни настапи да покажува основно непознавање од областа на правната и административната и управна постапка и притоа да се служи со очигледни невистини, манипулации и дезинформации кон граѓаните.
Очекувам господинот Заев јавно да се извини на македонските граѓани затоа што ги манипулира и дезинформира и воедно да им појасни од кои причини тоа го прави, од неукост, немање административен капацитет или тенденциозно од лични или политички причини“, стои во реакцијата на Оливер Андонов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.