Daily news
Османи најави агресивно адресирање на приоритетите за ЕУ
Владата забрзано работи на исполнување на акцискиот план за отстранување на сите пречки за влез во ЕУ. Вицепремиерот за евроинтеграции, Бујар Османи, денеска на прес-конференција информираше дека се во план краткорочни и долгорочни мерки што се потцртани на патот кон евроатланската агенда.
„Владата по средбите во Брисел, веднаш по слетувањето во Скопје формираше ад-хок комисија, која подготвува акциски план што мораме да го реализираме за да ги исполниме очекувањата на европските партнери“, вели Османи. Тој додава дека во изминатиов период биле остварени средби со институциите, по што се одржала и владина седница.
„Ни остануваат средби со уште редица институции, кои до Владата ќе предложат мерки за да можеме на седницата со еврокомесарот Јоханес Хан на 26 јуни да го испорачаме договореното. Краткорочно до локалните избори да ги имаме првите резултати и да испратиме порака дека агресивно ќе работиме на потцртаните реформи“, вели Османи.
Тој најави и долгорочни мерки, кои ќе продолжат да се реализираат по локалните избори, а кои ќе ја трасираат евроинтеграциската агенда.
„Гледаме прозорец на можност да се фатиме на таа енергија што ни ја испраќаат нашите пријатели од Брисел. Да се фатиме на таа клима и да ја тргнеме условената препорака и по локалните избори да добиеме порака за чисти преговори“, додаде Османи.
Тој информираше дека агендата почнува уште утре со посетата на Бугарија, каде што очекува да бидат затворени билатералните прашања меѓу двете земји. Исто така, се очекува Бугарија да биде партнер и поддржувач на Македонија, како иден претседавач на ЕУ.
„Работиме на отстранување на политичките пречки за евроинтеграциите, затоа утре патуваме во Бугарија за да бидеме високо на нивната агенда и да ги надминеме проблемите со нив.
За проблемот со името, Османи смета дека за него ќе треба време да се реши. Но, Владата е решена да гради мерки на доверба и пријателство за да не остави причина за пречки на патот кон евроинтеграциите.
„Имавме застој со реформите и сега треба да го компензираме изгубеното време“, вели Османи.
Додава дека Влада се обврзала дека ќе работи согласно суштинските разговори што ги имале во Брисел. Тој потенцира дека евроинтеграциите се државничка определба, а не владина и затоа најави дека во процесот ќе бидат вклучени сите.
„Ја оценуваме оваа влада како тематска, како влада за евроинтеграции. Сакаме процесот да биде инклузивен, во него да биде вклучено граѓанското општество, политичките партии, Собранието и сите релевантни институции. Сакаме да ги слушнеме различните ставови и на власта и на опозицијата“, потенцираше тој.
Во рамките на агендата за забрзани реформски приоритети, на 27 јуни се очекува да пристигне Рајнхард Прибе. На средбата со него треба се утврдат конкретни мерки, чекори и временската рамка до кога ќе треба да бидат заокружени задачите. На крајот, вицепремиерот додаде дека еден од предизвиците на новата Влада што ги очекува Брисел е и организирање фер и демократски локални избори.
Габриела Д.Мишевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.