Daily news
Откријте ја татарската национална кујна
Кралевите на рускиот фастфуд ќе бидат и ќе останат чебуреките (пирошка од тесто и месо), независно од обидите на странските окупатори – хамбургерите и донерот – да завладеат со овој престол.
Чебуреки – пирошки со парчиња овча или телешка удина и булјон, испржени во масло.
Чебуреките се најпознатото јадење од татарски кујна меѓу Русите. Овие пирошки со зајре од најпознатата кревка овча или телешка удина и булјон, испржени во масло, без сомнение се познати на сите жители на Русија од најраните времиња. Всушност тие се традиција не само за Русите: во педесеттите години од минатиот век чебуреките, добивајќи го името „лертсју“, на чуден начин се појавуваат во Финска и оттогаш се сметаат за оригинално јадење на финската кујна .
Надвор од границите на земјата, сепак, најпознатото татарско јадење е и ќе остане тартар – голема порција сурово сечено месо, прелиено со жолчка и маринада. Влегувајќи во мнозинството кујни на Европа, тартарот, или како погрешно го нарекуваат во татарски кулинарски книги „татарски бифтек“ (како може да е бифтек, ако не е пржен), не го губи својот национален карактер. Под национален карактер во дадениов случај се подразбира квалитет: за да не биде тартарот опасен по здравјето, неговите основни компоненти, кои не се поправаат поради отсуство на термичка обработка, треба да бидат со одличен квалитет и мошне свежи.
Тартар – порција сурово сечено месо, прелиено со жолчка и маринада.
Во високиот квалитет на производите, меѓу другото, се наоѓа и тајната на многу обични, но вкусни национални кујни, вклучувајќи ја и татарската. Изгледа – со малку зачини, обична технологија на подготовка, а ти иде да си ги излижеш прстите. Тука Татарите со право има со што да се гордеат: добитокот кој тие го одгледуваат во поволшските региони, дава месо со неповторлив вкус. Треба ли да се чудиме дека татарски кујна е претежно месна. Отстапка по префинетост и разновидност во споредба со кујните на другите турски народи, особено со Турците, Азербејџанците, кои ја комбинираат турската кујна со влијанието на големите кулинари како што се Персијците, татарски кујна, сепак, останува еден од лидерите (што се однесува за Русија) во печењето .
Бешбармак – варено месо со сос од лук
Јадењата од тесто се визит-карта на татарската кујна. Покрај наведените чебуреки во татарската кујна постојат стотици сорти на пити, пирошки, бисквити и други пекарски производи.
Јадењата од тесто се присутни во животот на Татарите од раѓањето до смртта, а многу од јадењата носат ритуален карактер. Дури полнетата гуска, која во Русија многу ја сакаат, Татарите ја подготвуваат по свој терк – ја печат во тесто. Конкуренција на чебуреките, како кулинарски ремек-дела е чак-чак: тоа е пржен десерт од пченично брашно во мед, кој може да се најде во повеќето руски продавници. И во листата на производите за извоз чак-чак е „ѕвезда“.
Чак-чак – пржен десерт од пченично брашно во мед.
РЕЦЕПТ
Губадија – татарска празнична пита
Губадија отсекогаш била главно татарски тест јадење – тоа е сложена пита (со месо, секако), кое се служи во особено свечени случаи. Да се обидеме да го направиме.
Направете тесто за голема пита, по ваш избор, може да биде со или без квасец.
Во еден литар млеко ставете 200 грама кисело млеко и почекајте 2-3 часа за да стаса. Потоа варете на тивок оган додека смесата не почне да се зацрвенува, па додајте 2 супени лажици шеќер. Прецедете низ газа. Смесата што ќе ја добиете треба да биде со црвена боја.
Измијте го и сварете го оризот. Нека биде сварен ал денте. Исечкајте неколку тврдо варени јајца. Меленото телешко или јагнешко месо запржете го со кромид и со мелен црн пипер. Во врела вода покиснете суво грозје, суви модри сливи и суви кајсии.
Во длабока тава, подмачкана со масло, ставете половина од тестото кое е растегнато со дебелина од половина сантиметар. Потоа ставете го зајрето во делови – најпрво оризот, потоа прецеденото млеко, па јајцата, па повторно ориз. Последниот дел нека биде покиснатото суво овошје и малку ориз. Одозгора ставете неколку парченца путер.
Одозгора затворете со преостанатото тесто, а додека го затворате, обидете се да направите дипли за да изгледа поубаво. На крајот премачкајте со изматена жолчка.
Печете во рерна на температура од 200 степени, додека губадијата не се зарумени и додека од отворите не почне да излегува пареа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.