Daily news
„О2“: Најнизок удел за заштита на животната средина во буџетот за 2018 година
Само 0,4 проценти од буџетот за 2018 година се одвоени за заштита на животната средина, што е најниско ниво досега, оценуваат од Коалицијата „О2“ за чист воздух.
„Нели здравата животна средина, чистиот воздух, чистата вода ќе беа приоритет?! Или толку беше, кампањите завршија, па може да се продолжи по старо, со празни реторики, некои минискулни поместувања, а во реалноста само 0,4 проценти одвоени за заштита на животната средина. За 2017 беа планирани 1,12 процент за гасификација, а 0,95 отсто се планирани за 2018. Кога се одвоиле повеќе од вкупниот буџет? Во 2017 или 2018? Е, сега, колку од тоа се реализирало или ќе се реализира е веќе сосема друга приказна. На крајот овие бројки може да се сосема поинакви. Најчесто пониски. Министерството за животна средина и просторно планирање е едно од тие со хронично ниска реализација од планираното. Да не кажеме фиксирана на 70 отсто. Зaштитата на животна средина котира малку подобро. На што се должи ваквата ниска реализација на и така малиот буџет нам не ни е познато, но очекуваме да ни разјаснат како од МЖСПП така и Министерството за финансии. Она што знаеме е дека оваа пракса мора да запре. Почнувајќи со 2018 година“, реагираат од Коалицијата за чист воздух.
Додаваат дека сегашната Влада двапати го намалила годишниот буџет на МЖСПП, министерството што е клучно за намалување на загадувањето.
„Летоска го скрати 23 отсто, а изминатава сабота Собранието си изгласа уште 8,8 отсто намалување. Образложението беше дека и онака тие пари нема да може да се искористат. Повторно доаѓаме до таа магична бројка од 70 отсто искористеност. Како да се планира од самиот почеток само толку да се потроши. МЖСПП за 2018 побарало 14,4 милиони евра, Министерството за финаснии му одобрило помалку од 10,7. Четвртина од побараното не одобриле, што е 3,7 милиони евра. Од Министерството за финансии неформално ни беше кажано дека барањата за поголем буџет за заштита на животната средина и намалување на загадувањето треба да ги упатиме до МЖСПП зашто преку нив се реализираат овој тип програми и за тоа секогаш има пари. Зошто тогаш не е одобрен побараниот буџет во целост?“, прашуваат од Коалицијата за чист воздух.
Оттаму споредуваат дека доколку ги видиме само собраните даноци поврзани со животна средина во 2015, тие се 16 пати поголеми од сумата доделена за Министерството за животна средина и просторно планирање за 2018. Тоа би значело дека МЖСПП можело основано да побара буџет од 3 отсто од вкупните расходи, а за заштита на животна средина требало да се одвојат 4,4 проценти.
„Во најголемиот буџет досега, каде што со значителна сума учествуваат даноците поврзани со животна средина и зголемената акциза на нафтата, ние имаме најнизок процент на доделени средства за заштита на животна средина. Кога ќе видите специфично колку се одвоени за намалување на загадувањето, нашиот најгорлив проблем, за 2018 одвоени се само 11 отсто од сумата наменета за заштита на животната средина, односно 1,7 милион евра, од кои, пак, да биде уште повесело, за намалување на аерозагадувањето, и тоа заедно со мониторинг, само 635 илјади евра“, велат од Коалицијата за чист воздух.
Додаваат дека за патни трошоци во Собранието се одвоени двапати повеќе средства од тие за мониторинг и заштита од аеорзагадување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.