Daily news
Попоски: Локалните избори ќе бидат главниот тест на јавното мислење
Министерот за надворешни работи во техничката влада и потпретседател на ВМРО-ДПМНЕ Никола Попоски смета дека локалните избори ќе бидат главниот тест за тоа што мислат граѓаните во врска со одлуките на политичките партии и со чекорите преземени по парламентарните избори од 11 декември. Во интервју за Независната балканска новинска агенција (ИБНА), Попоски вели дека локалните избори треба да се одржат што поскоро и дека најдобро е заедно со нив да се одржат и парламентарни избори, иако признава дека „Собранието е она што треба да донесе одлуки за следните чекори. Вклучувајќи го и чекорот за тоа кога можеме или дали можеме да ги одржиме очекуваните парламентарни избори“.
– Сакам да речам дека се случиja многу работи по изборите во декември. Имавме исклучително поларизирана политичка атмосфера. Според ВМРО-ДПМНЕ постоеше сериозна загриженост околу фактот дека се воведоа нови елементи што не им биле претставени на граѓаните во текот на изборниот циклус. Одлуките направени потоа во Собранието дефинитивно влијаат врз мислењето на јавноста. Не кажувам однапред што ќе се случи. Едноставно велам дека локалните избори ќе бидат следниот чекор каде што ќе може да се измери какво влијание имале одлуките донесени од едната или другата страна врз мислењето на јавноста. И воопшто не донесувам заклучоци за исходот. Во овој поглед, ВМРО-ДПМНЕ смета дека најдобриот чекор можеби би бил да се спојат локалните со парламентарните избори и да им се даде можност на граѓаните да кажат што мислат за платформите и програмите на партиите. Но реално земено, ова е одлука што може да ја донесе само мнозинството во Собранието – рече Попоски.
Одговарајќи на прашањето дали постои стравување од „Голема Албанија“ Попоски потенцира дека тоа не е патот кој носи напредок бидејќи промената на границите на Балканот, гледано според таквите обиди во минатото, ни донела само лоши работи, невини жртви и ужасни последици.
– Сметам дека единствениот пат напред е земјите во рамки на постојните граници да се приклучат кон ЕУ и да се намалат тензиите преку фокусирање на реални нешта: работни места и економски развој. Убеден сум во тоа – вели Попоски.
Во врска со односите меѓу Македонија и Грција Попоски истакнува дека потпишаниот меморандум за разбирање бил добар за граѓаните и за економијата но тој не е нешто што автоматски ќе ги реши разликите што постојат. Објаснува дека проблемот со името ќе се надмине само преку почитување „на дел од основните принципи на кои се согласивме сите, на меѓународно ниво. Таа сигурно значи дека треба да ги земеме предвид грчките чувства во поглед на ова прашање, но најпрво треба да се почитуваат овие основни принципи и во случајот на Македонија“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.