Daily news
Портрет на новиот „раста“ министер за култура: Ќе го стопирам налудничавиот проект „Скопје 2014“
Развојниот пат и биографијата на новиот министер за култура, Роберт Алаѓозовски, во целост се посветени на културата, особено на издаваштвото и развојот на културните политики. Неретко јавно се огласуваше со свој коментар за каков било облик на репресија во државата, и е голем обожавач на рокенрол културата и јамајканската “раста“ идеологија. Во кусото интервју кое го даде за Макфакс вели дека приритетите ќе бидат стопирање на налудничавиот проект “Скопје 2014“, нов закон за заштита на културно наследство и департизација на институциите во културата.
-“Скопје 2014“ мораме веднаш да го запреме затоа што како од Пандорина кутија, секојдневно, во глуво доба и во црн мрак излегуваат нови кичести споменици, скулптури, пасажи, колонади коишто никому не му требаат, а кои прескапо ни ги наплаќаат, изјави за Макфакс Алаѓозовски.
Културното наследство. според него мора веднаш да се заштити затоа што секојдневно поради негрижа се оштетува и се губи.
-Во таа смисла ќе донесеме нов закон за заштита на културното наследство и ќе ја утврдиме приоритетната листа на споменици на кои им е потребна итна заштита. Веднаш ќе ја подобриме транспарентноста на Министерството и ќе направиме реформа на она што се нарекува Годишна програма за остварување на националниот интерес.
Бидејќи претходниот стратешки план на Министерството истекува годинава, ќе направиме сеопфатна анализа на неговата имплементација, воедно и анализа на целокупната состојба во културата, во институциите и тоа ќе биде база за утврдување на новата културна политика и приоритетите на новиот стратешки план. Ќе почнеме веднаш со развој на публика и на културна децентрализација, со цел да овозможиме секој граѓанин да го оствари правото на култура, вели Алаѓозовски.
Тој најавува ревизија во првите шест месеци на “Скопје 2014“.
-Ќе направиме сериозна анализа на тоа што е изградено, што е вградено, колкава му е вредноста, колку ќе чини одржувањето на тие згради и обележја. Ќе направиме меѓународна конференција за проектот со развој на идни сценарија што со него. Ќе бидеме внимателни со решенијата. Десетпати ќе мериме, еднаш ќе сечеме, по сеопфатна граѓанска дебата. Она што секако веднаш ќе го направиме е да извршиме деконтаминација на македонскиот дух од квазиидеологијата што овој проект ја еманираше и што сè уште ја држи земјата заробена како зла клетва на некој лош маѓепсник.
За себе вели дека е професионален и непартиски кадар.
-И тоа не е по исклучок, туку сме со намера да биде правило. И досегашните закони пропишуваа професионализација и департизација, но, за жал, беа изиграни. Ние ќе ги почитуваме законите и ќе имаме активна културна политика, во склад со општите владини политики за враќање на државата на граѓаните.
Алаѓозовски е основач и главен уредник во издавачката куќа „Готен“. Претседател и проектен директор во Здружението на граѓани „Есперанца светски културен центар“. Се занимава со менаџирање на интердисциплинарни проекти од областа на културата (Критичка култура, интеркултурна соработка, глобална мобилност).
Роден е во Струмица во 1973 година, оженет и татко на две деца. Член е на Друштвото на независни писатели на Македонија.
Матурирал во 1992 година во гимназијата „Јосип Броз Тито” во Скопје, во културолошка насока, со одличен успех.
Дипломирал во 1997 година на Катедрата за Општа и компаративна книжевност при Филолошкиот факултет во Скопје, со просек 9.03. Одбранил дипломска работа на тема: „Романот ‘Ние’ од Евгениј Замјатин во контекст на негативната утопија”.
Во 2002 година ја одбранил магистерска тема со наслов „Теориско-поетички аспекти на македонската постмодернистичка проза” на Катедрата за општа и компаративна книжевност при Филолошкиот факултет во Скопје, а во 2006 година се стекнува со европска диплома по културен проектен менаџмент во организација на фондацијата „Марсел Хиктер“ од Брисел.
Од 2011 година е во подготовка на докторска теза од областа на културниот менаџмент на Економскиот факултет при Универзитетот Св. Кирил и Методиј, Скопје.
Од 2005 до 2014 година бил претседател на Европската мрежа на менаџери во културата „Оракл“ со седиште во Брисел.
Член е на педагошкиот тим на Европската диплома по културен проектен менаџмент со седиште во Брисел.
Исто така, бил член на уредувачкиот одбор на слисанието „Сараевски тетратки“.
Ана Василевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.