Daily news
Постхумно објавена книгата „Соочувања“ на Зоран Тодоровски
Друштвото за издавачка дејност „Македоника литера“ од Скопје неодамна ја објави книгата „Соочувања“ на Зоран Тодоровски, која содржи статии, пригодни текстови, научни реферати, промотивни текстови, предговори за публикации, сценарија за историски документарни филмови, интервјуа и слични прилози.
Проф. д-р Зоран Тодоровски (1950-2015), кој беше еден од најпродуктивните македонски истражувачи и автор и приредувач на голем број научни (историографски) публикации, во некои од овие научни и афирмативни, историографски и културолошки прилози изнесува дотогаш помалку познати податоци и сознанија за македонската национална историја, ставови и гледања за одредени историски прашања и личности, а во други, пак, нуди сублимирани текстови од негови научни студии (работени за сценарија и слични потреби и пригоди), кои се извонредни историографски четива за поширок круг читатели. Вредноста и важноста на овие текстови се поголеми ако се има предвид фактот дека Тодоровски беше најактивниот македонски истражувач во балканските архиви во последните три децении и своите текстови ги базираше врз автентични архивски документи, односно во своите научни историографски трудови тој ја изнесуваше историската вистина, потпирајќи се првенствено и исклучиво врз фактографијата, односно врз податоците и сознанијата кои произлегуваа од архивската граѓа до која доаѓаше. Тој беше упорен и темелен истражувач, а темелен и педантен беше и во своите пишани трудови.
Иако тематски, жанровски и методолошки оваа книга е хетерогена, таа претставува една хомогена публицистичко-историографска и научна целина и дава една посеопфатна слика за плодниот научноистражувачки ангажман, односно за научниот профил на авторот.
Во предговорот на книгата проф. д-р Владо Поповски, меѓу другото, за книгата и за местото на Тодоровски во македонската историографија пишува:
„Д-р Зоран Тодоровски, без сомнение, е најзаслужниот историчар во Република Македонија кој ја тематизираше и ја наметна научната расправа за т.н. десница во македонското ослободително движење. На тој начин таа тема, со време, стана редовно присутна во македонската историографија. Со тоа, тој дел од македонското ослободително движење раководено од ВМОРО и ВМРО беше приопштен кон историската меморија на Македонците без, притоа, априори да биде негативно квалификуван како што, обично пред тоа, било чинето. За таквата промена во тематската структура и анализа, д-р Зоран Тодоровски е заслужен не само со тоа што самиот истражил, напишал и објавил туку и со тоа што, како долгогодишен директор на Државниот архив на Република Македонија придонел да бидат прифатени и финансирани бројни проекти за македонското ослободително дело од споменатиот десен блок.
На таков начин многу значајни настани и дејци од македонското ослободително движење и многу раководители на ВМОРО и ВМРО, од редовите на десните структури, се најдоа во истражувањата и содржините на бројни проекти и студии на историската наука и публицистика во Република Македонија. Со тоа, улогата на тие раководители и актери и на од нив придвижените процеси и правци во македонското револуционерно движење од периодот 1908 – 1934 година е оценета пообјективно, покрај другото и поради афирмираниот метод – таа улога да се промислува врз изворна документација и врз принципот sine ira et studio, за што, во тој домен, д-р Зоран Тодоровски има пионерска улога… Имено, тој прв најобемно и систематски почна да користи изворна документација за улогата на раководителите и дејците на десницата во Македонската револуционерна организација во обид таа улога да ја објективизира поврзано со историскиот контекст на условите и настаните…
Д-р Зоран Тодоровски има заслуга како научник кој придонел историографијата во Р. Македонија да стане подинамична, поинтересна и, што е најважно, да стане и да остане отворена кон сите релевантни настани, процеси и актери на македонското ослободително движење кои биле поврзани со борбата и судбината на Македонија“, пишува проф. д-р Владо Поповски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.