Daily news
Почна одбројувањето за Пиво фест 2017
Од 13 до 16 јули, по 15. јубилеен пат, во Прилеп ќе се одржи најголемиот и најатрактивен фестивал на овие простори Пиво фест 2017.
Фестивалот ќе има богата музичка програма што ќе ги задоволи вкусовите на сите генерации. В четврток, на 13 јули, фестивалот ќе го отвори македонската група Ај кју, забавата потоа ќе продолжи со култната група Психомодо поп, а првата вечер ќе ја затвори Амадеус бенд. Петокот е резервиран за Дон Минот & Канкеринг лајон, Нокаут и Ален Исламовиќ. Во саботата публиката ќе ја забавуваат Елена Велеска, Анабела и Харис Џиновиќ. На последната вечер од фестивалот ќе настапат Тајфата со Димитар Андоноски, Џамбо Агушев и ѕвездата на овогодишниот фестивал Северина. Секоја година заинтересираноста како на публиката така и на угостителите кои учествуваат во овој настан е голема.
„Имаме пријавено околу 25 штандови, кои ќе се простираат на површина од околу 5.000 м2. Имаме учесници кои учествуваат и за првпат – ќе имаме белгиско, ирско, англиско, германско, грчко и сараевско пиво. Најголемата ексклузива можеби ќе биде тоа што освен застапеноста на пива со стандарден процент на алкохол ќе имаме и пива со повисок процент, како пива со 7, 8 и пива со 9 проценти алкохол“, истакна Талија Петреска, ЦГИ – организатори на Фестивалот.
Генералните спонзори на фестивалот Скопска и Прилепска пиварница истакнаа дека очекуваат одлична забава и многу публика која ќе ги проследи настапите на музичките ѕвезди во предвидените 4 дена на Фестивалот.
„Единствениот јазик на кој може да се разберете каде и да сте е пивото. Пивото ги поврзува народите и цивилизациите така што токму тоа ќе се случува за овој Пиво фест и тоа ќе биде нашата мисија, на сите наши консументи да им понудиме нови вкусови и пива. Тоа на нашиот штанд ќе биде Лашко. Верувам дека ова е една од тие одлични можности во кои луѓето уживаат во доброто пиво и храна“, рече Катерина Хаџи Ангелеска Начевска, претставник на Скопска пиварница.
„Прилепска пиварница и годинава ќе понуди доста уживање и изненадувања. Ве покануваме на нашиот штанд да го видите новото руво на нашиот јунак, нашето Крали Марко, по кое што градот е познат“, рече Искра Конеска, претставник од Прилепска пиварница.
Градоначалникот на Прилеп, Марјан Ристески, ги покани сите љубители на пивото и добрата забава од Македонија и поширокиот регион да дојдат на 15. јубилејно издание на Пиво фестот и искажа голема благодарност до организаторите кои секоја година се партнери заедно со локалната самоуправа, а тоа се двете најголеми наши пиварници, Прилепска пиварница и Скопска пиварница и секако Центарот за граѓанска иницијатива.
„Ќе има музика за сите генерации од 7 до 77 за да може секој да се пронајде во репертоарот. Работното време на сите угостителски објекти ќе биде продолжено до 3 часот наутро и секој од овие угостителски објекти по официјалната програма си има организирано своја програма до раните утрински часови. Посебно интересно ќе биде во новиот Аква парк – Салида, кој ќе биде интересно освежување и секако една од најголемите дискотеки во Македонија, клубот „Калипсо“. Како и секоја година ќе имаме организирано бесплатен кампинг на Паркот на револуцијата. Како добри домаќини се грижиме сите кампери кои доаѓаат од целиот свет во утринските часови да бидат послужени со бесплатна чорба, кафе и чај. Паркинзите и режимот на сообраќај ќе бидат максимално регулирани, нема да има никаков проблем во однос на паркирање на возилата“, изјави Марјан Ристески, градоначалник на Прилеп.
Во Прилеп сите хотелски капацитети, како и приватното сместување се речисуи резервирани. Организаторите на фестивалот ги покануваат сите оние кои сакаат да присуствуваат тука за овие фестивалски денови да си резервираат сместување во најбрз можен рок. Како и секоја година упатено е барање за бесплатен превоз до МЖ, за возовите кои ќе сообраќаат на релација Скопје – Прилеп. А има и најава од туристички агенции за организиран превоз на посетители од соседните држави.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.