Daily news
Првата турнеја на Трамп “да се биде или не” за неговиот мандат
Првата турнеја на претседателот на САД, Доналд Трамп, во странство откако е на функцијата е „да се биде или не“ за неговиот мандат.Со оглед на сериозните скандали и проблеми со кои се соочува дома, турнејата што почнува денеска ќе биде сериозен тест за него како претседател на САД.Ако не заврши како целосен неуспех, таа може да се смета за успех, пишуваат медиумите во САД.Трамп прво ќе ја посети Саудиска Арабија, по што ќе оди во Израел, Ватикан, Италија и Белгија.
Минатата недела беше една од најтешките за Трамп од неговата инаугурација во јануари. Одлуката за ненадејното разрешување на директорот на ФБИ, Џејмс Коми, наиде на жестоки критики и обвинувања за попречување на истрагата за мешањето на Русија во американските избори и доведе до именување на специјален обвинител за да се обезбеди неговата независност и да се ослободи од политички притисок. Можноста за негово отповикување се повеќе се споменува.
Покрај тоа, на состанокот со рускиот министер за надворешни работи, Сергеј Лавров тиј издаде доверливи информации за терористичките активности во исламските земји, до кои САД дошле благодарение на соработката со израелските тајни служби. Овој инцидент лесно може да биде една од темите за време на посетата на Израел.
Во рамките на Белата куќа, ситуацијата е далеку од идилична, со се поголемиот број на службеници кои им јавуваат на медиумите за растечкиот јаз во рамките на администрацијата и невозможната мисија за санирање на сериозната штета што ја произведува Трамп речиси со сите негови изјави и акции. Стресот кој доаѓа со патување во странство и јавни посети на странски државници може да ги влоши постојните тензии.
Некои официјални лица кои се наклонети на Трамп сметаат дека ова би можело да биде негова последна шанса да ја спаси неговата позиција. “Ова е еден вид да се биде или не за Трамп, изјави официјален претставник за Си-Ен-Ен.
“Едно прашање што ги интересира сите надвор од САД, а веројатно нема да го прашаат, е која е неговата вистинска политичка моќ во однос на поделбите во Конгресот и во неговата партија? Може ли тој да продолжи со својата политичка агенда? Тоа сигурноќе биде главна дилема додека посетува странски земји “, коментира Ентони Кордесман на Центарот за меѓународни и стратешки студии.
Првата странска турнеја и без овие проблеми е сериозен предизвик за претседател без дипломатско искуство: досадниот протокол, меѓународните конференции и официјални вечери и многуте можности за гафови и дипломатски инциденти сигурно ќе го привлечат вниманието на телевизиските камери.
Уште повеќе што Трамп за своја прва дестинација избра земји со кои има многу сложени односи. На неговата прва турнеја тој ќе треба да се справи со тешки прашања како што се израелско-палестинскиот мировен процес, исламизмот во Блискиот Исток, иднината на НАТО што тој самиот ја доведуваше под прашалник во изборната кампања и загриженоста на европските сојузници поради неговата протекционистичка трговска политика.. Крај/мк
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.