Daily news
Пропадна договорот со Бугарите, „Фени“ со 850 вработени повторно пред стечај
Бугарската компанија „Енекод“, која требаше да го купи кавадаречкиот комбинат „Фени“, не ги уплатила потребните средства за да ја потврди купопродажбата. Вработените велат дека стечајот за „Фени“ станува се поизвесен оти роковите на попишаниот имот од извршителите се истечени и почнува наплатата на долговите.
„Договорот пропадна. Бугарите две недели преговараа, ветуваа сè и сешто, но ништо не уплатија. Рокот истече и сега имотот на фабриката е на банките и на оние кон кои имаме долгови. Ние сме на последно место со нашите побарувања“, велат вработените од фабриката.
Диртекторот на „Фени“, Јусуф Миракхмедов, повторно е недостапен за објаснување на случувањата во фабриката. На неговиот мобилен телефон цел ден се вклучува сандаче за оставање говорна порака.
Претседателот на синдикатот на „Фени“, пак, Ѓоко Палитов, вели дека се во исчекување.
„Немаме никакви информации за пропаѓање на договорот. И новото и старото раководство на фабриката се на состаноци во Скопје. Има многу шпекулации и сметам дека политиката е многу вмешана во овој случај. Ние имаме најава дека новиот газда, Бугаринот што ни се претстави како извршен директор на ‘Енекод’, ќе дојде и ќе ни даде информации за исплата на платите. За некој час очекуваме да добиеме информација. Со него треба да разговарам јас лично, но засега немам никаква информација“, изјави Палитов за „Макфакс“ .
На почетокот на неделава некои од вработените јавно се посомневаа дека продажбата е уште една измама, која на краток рок треба да му обезбеди бегство на сегашното раководство, кое, според нив, е највиновно и директно одговорно за прекинот на производството и огромните долгови на фабриката. Вработените ги кажаа сомневањата кога утврдиле дека за финализирање на договорот со бугарската компанија останува банките со кои соработува „Фени“ да се согласат на продажба, а за да се согласат, побарале кеш отплата на дел од долгот и гаранции за отплата на преостанатиот дел како доказ за сериозноста во намерите на инвеститорот, но не добиле никакви гаранции ниту, пак, отплата.
„Се сомневаме дека ветувањата за исплата на платите, и тоа во целосен износ, и отплатата на долговите се само димна завеса за бегство на раководството. Сегашните ќе си заминат, а новите за еден-два месеца ќе кажат дека не успеале да ја оживеат фабриката и одговорност за нелегалните дејства и одливот на пари што актуелното раководство ги реализира преку „Нова логистик“, фирмата што од ќерка на ’Фени’ стана приватна сопственост на менаџерката и блиска пријателка на Миракхмедов, никој нема да преземе“, се посомневаа вработените.
„Макфакс“ истражувајќи ја компанијата„Енекод“ дојде до податок дека за првите шест месеци од работењето годинава, компанијата пријавила загуба од 640.000 лева, односно 320.000 евра. За да го преземе „Фени“ компанијата минатата недела се обврза да го плати и целиот долг кој надминува 70 милиони евра.
Вработените во „Фени“ и денес се на работа, исто како и цел месец откако трае кризата во фабриката, иако производство нема, туку само се одржува топла единствената производна линија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.