Daily news
Радев: Бугарија и Македонија отсекогаш биле пријателски земји
Македонија и Бугарија покажаа дека, покрај заедничкото минато, може да имаат и заедничка иднина. Двете земји отсекогаш биле пријателски, а Бугарија ќе продолжи да ѝ помага на Македонија на патот кон ЕУ и НАТО. Ова го изјави бугарскиот претседател Румен Радев во интервју за БГНЕС непосредно пред дводневната посета во Скопје.
Тој нагласи дека Македонија се одлучи за нова перспектива, а црквите дејствуваат мудро. Според зборовите на Радев, успехот ќе биде огромен доколку Македонија добие покана за преговори за членство во Европската Унија за време на бугарското претседателство со Советот на ЕУ. Сепак, доколку тоа не се случи сега, двете земји треба да ја завршат работата заедно и Македонија да успее да се интегрира во меѓународните организации.
„Бугарија може и треба да помага, ние отсекогаш сме биле пријателска земја со Република Македонија, па мораме да го споделиме и ова искуство. Како што знаете, секогаш сме помагале, бевме првата земја што ја призна независноста на Република Македонија. Ние бевме тие што помогнавме во тешки времиња, и со економска и со воена помош, па подготвени сме да помогнеме во секое време“, рече Радев.
Во врска со спорот за името, бугарскиот претседател смета дека неопходно е да се пронајде решение што нема да влијае не само на интересите на Македонија и Грција туку и на Бугарија.
„Јас верувам дека овој спор ќе биде решен на таков начин што нема да влијае на интересите на ниту една од овие три држави. За нас тоа значи во името да нема географски одредници што содржат делови од територијата на Бугарија. Затоа, ќе бидеме во контакт со македонските власти за да се изнајде решение на најдобар можен начин. Јас сакам да им заблагодарам на премиерот Заев и на претседателот Ѓорге Иванов за храброста бидејќи она што се случува во Македонија, односно позицијата што ја зазеде раководството на Република Македонија, беше пресвртница. Таа даде шанса за нова перспектива за која секогаш сме биле отворени во Бугарија. Раководството на Република Македонија рече: Ќе ги оставиме проблемите во минатото, мора заедно да се надеваме на иднината. Се разбира, ние ја поздравуваме таквата политика, тоа е она што секогаш сме го посакувале во Бугарија. Ќе ја поддржуваме ваквата политика и еден ден навистина луѓето од двете страни на границата ќе се чувствуваат како браќа“, рече Радев.
Претседателот на Бугарија утре ќе пристигне во дводневна посета на Република Македонија. Румен Радев ќе биде придружуван од двајца митрополити на Бугарската православна црква.
Е. Т.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.