Daily news
Раденковиќ по скандалите: Не знам за договорот за самораспуштање на органите на Институтот на сметководителите
Претседателката на Институтот на сметководителите и овластените сметководители е разрешена во законска постапка, изјави Сашо Раденковиќ, претседател на Надзорниот одбор на Институтот. „Макфакс“ во вторникот објави дека Институтот го тресат скандали бидејќи во управните органи бил утврден непотизам и низа неправилности во работењето поради што било договорено самораспуштање на сите органи, а договорот не го почитувал претседателот на Надзорниот одбор оти пред да се одржи седницата, на која на дневен ред како последна точка било самораспуштањето, ја отповикал претседателката.
Институтот од 22 декември, кога е отповикана претседателката Ленче Папазовска, нема претседател и нема кој да ги потпишува барањата за лиценци и уверенија поради што се соочува со казни од над половина милион евра имајќи предвид дека казната за едно задоцнување е 6.000 евра, а според сметководителите, доцнење има кај 100-ина барања.
Одговорот на претседателот Раденковиќ доцни оти тој изминативе три дена рече дека имал многу работни обврски. Вели дека не знаел оти има договор за самораспуштање на сите органи на Институтот ниту, пак, добил покана за седница на која на дневен ред ќе биде самораспуштањето.
„Никаков договор немало, ниту устен ниту писмен, за какво било самораспуштање, а доколку имале таква идеја, членовите на Управниот одбор не ја соопштиле до нивното отповикување, ниту понесуваат одговорност со прифаќање на нивното разрешување, што е доказ дека ниту планирале ниту сами ќе дале оставка“, рече Раденковиќ.
Папазовска е разрешена без позитивно мислење од Министерството за финансии, на што е обврзан Надзорниот одбор. Од Министерството на прашањата од „Макфакс“ зошто не издале позитивно мислење за разрешувањето, кусо одговорија дека мислењето не е дадено оти не било поднесено барање. Раденковиќ вели дека поднел барање за што има цела преписка со Министерството. Вели дека не знае зошто Министерството ја одолжува смената, што, според него, е на штета на сметководителите.
„Сметаме дека со издавањето позитивно мислење би се надминале проблемите и Институтот би можел непречено да продолжи со работа. За да дојде до нормализирање на функционирањето на Институтот на сметководителите и овластените сметководители, уште еднаш апелираме до Министерството за финансии да издаде позитивно мислење“, рече Раденковиќ.
Тој тврди дека ја отповикал Папазовска оти така одлучиле една половина од избраните претставници од подружниците во Собранието на Институтот поради нетранпарентно и неотчетно работење. Наведува дека Надзорниот одбор немал увид во материјално-финансиското работење на Институтот, а забележува и за тоа што ниту една одлука на Институтот не била објавена на интернет-страницата иако тоа е законска обврска.
Отповиканата Папазовска, пак, вели дека сите нејзини обиди да објави нешто на интернет-страницата на Институтот завршувале со закани дека ако објави, ќе добие кривична пријава и токму затоа целата документација за материјално-финансиското работење со сите податоци за тоа кому Институтот му префрлал пари ја поднела во Министерството за финансии.
Скандалите во Институтот од средата ги истражува Управата за финансиска полиција.
(М. И. П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.