Daily news
Самсоненко: Се сомневаме во нечесни игри за дуелите со Флензбург, ако биде така ќе се повлечам од ракометот
Германски Фленсбург е последната пречка за ракометарите на Вардар кон пласманот на завршниот турнир во Лигата на шампионите. Првиот натпревар, во Германија, ќе се одигра во сабота, а реваншот во Скопје е на 23.април. По тој повод, клубот во средата, организира прес конференција, на која првиот човек на Вардар, Сергеј Самсоненко, сподели со јавноста дека стравува од задкулисни работи, односно дека стравува од влијанието на судиите.
Вардар четврта година по ред е дел од најдобрите осум екипи во Лигата на шампионите, но во претходните три не успеа да избори пласман на завршниот турнир во Келн. Сезонава, која во клубот веќе се оценува како успешна, последна пречка на патот кон Келн, на вардаровите ракометари е Фленсбург.
Првиот натпревар на програмата е во сабота, во Германија, а реваншот е на 23.април, во СЦ „Јане Сандански“ во Скопје.
На неколку дена пред првиот меч, во Вардар се сомневаат дека во двомечот со Фленсбург ќе имаат чесно судење. Темата на прес конференцијата ја отвори спортскиот директор Едуард Кокшаров, а на неа се надоврза и првиот човек на Вардар, Сергеј Самсоненко.
„Сакам да го кажам истото што го кажа и спортскиот директор Кокшаров, дека имаме лоши информации. Јас не сакам да зборувам за што поточно се работи, само сакам да кажам дека ние ќе дадеме сè од себе за го поминеме Фленсбург. Единствено сакам да поставам прашање пред јавноста, дали ние го заслуживме ова. Мислам дека го заслуживеме, не само поради развојот на екипата, туку поради развојот на целата инфраструктура, вклучувајќи ги и младинските школи. Тоа е иднината на македонскиот ракомет. Ние трошиме многу сила и енергија, за пари не сакам да зборувам, на развојот на детските школи и развојот на младинските категории. Исто на овој пат се наоѓа и нашиот главен конкурент во македонскиот ракомет Металург“, рече Самсоненко.
Европската ракометна федерација за првиот натпревар во Германија ги делегираше судиите од Словенија Крстич и Љубич, додека реваншот во Скопје ќе го судат Данците Гјединг и Хансен.
Изборот на данската судиска двојка, да ја дели правдата во реваншот, ги поттикна сомнежите во клубот дека Фленсбург се фаворизира во борбата за пласман на завршниот турнир.
„Не ми е јасно зошто ги одредија да судат „нашите пријатели“ од Данска, кои ни судеа овде против Барселона. Целиот спонзорски тим на Фленсбург е од Данска. ЕХФ тоа така го одреди, ние треба да го почитуваме тоа и да се надеваме и од Фленсбург и од ЕХФ ќе го следат овој натпревар, дека сè ќе биде како што треба и дека нема да се повтори она што се случи пред три години. Јас можам да кажам дека доколку се повтори она што се случи пред три години дека јас ќе се повлечам од ракометот. Јас повеќе немам сила да се борам. Тоа не значи дека јас ќе заминам, ќе останам во Вардар, но ќе ги поддржувам младите категории, ќе ги развиваме ракометните школи, кои се иднината на ракометот во Македонија. Но да инвестираме толку многу пари, секоја година по седум милиони евра во ракометниот клуб и да се случи истото она од пред три години…јас повеќе не можам да го издржам тоа“, рече Самсоненко.
Сопственикот на Вардар, на прес конференцијата, побара од целата македонска јавност, но и од оние кое живеат во Германија, да го поддржат клубот во двомечот со Фленсбург. Првиот натпревар помеѓу Фленсбург и Вардар во сабота ќе стартува во 17:30 часот. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.