Daily news
Свечена академија по повод 55 години РСБСП
Изминатите два дена се случија два особено важни настани за Републичкиот совет за безбедност на сообраќајот на патиштата, пришто Претседателот на Република Македонија, Ѓорге Иванов додели високо општествено признание „Повелба на Република Македонија“ на Републичкиот совет.
Доделувањето на оваа високо општествено признание е заслуга за сиот минат труд, за сите успешно организирани кампањи, конференции, настани и манифестации во изминатите години а поводот е одбележувањето на 55 години активно постоење и работа на Републичкиот совет за безбедност на сообраќајот на патиштата.
„Овој, за нас, несекојдневен чин, доделувањето на високото опшественото признание „Повелба на Република Македонија“ на Републичкиот совет за безбедност на сообраќајот на патиштата, токму сега, кога Советот одбележува важен јубилеј – 55 години постоење и активно дејствување, за Советот, претставува голема чест, доверба, обврска и мотив повеќе, во иднина да продолжиме уште поинтензивно да работиме кон остварување на нашите заложби за намалување на бројот на настрадани лица во сообраќајни незгоди
“, изјави претседателот на РСБСП, Стојче Стаменковски по повод доделувањето на високото признание од Претседателот на Република Македонија.
Мал број организации во Република Македонија кои можат да се пофалат со долгогодишна историја и кои повеќе од половина век се присутни, активни и поддржани од граѓаните. Републичкиот совет за безбедност на сообраќајот на патиштата, со своите активности, изминативе 55 години, се промовира како едно од водечките тела во државата за унапредување на сообраќајно превентивното дејствување. Со своите бројни активности, Советот секојдневно ја демонстрира својата посветеност за градење општество со високо ниво на сообраќајна култура, општество со ефикасен систем за управување и контрола на патниот сообраќај, додаваат од организацијата.
Во рамките на активностите за одбележување на 55 години постоење и активна работа на РСБСП изразуваме благодарност до сите општествени чинители кои на било кои начин го поддржуваат и помагаат РСБСП во остварувањето на високи хумани и цивилизациски вредности, како што е спасувањето човечки животи и намалување на бројот на загинати и повредени лица во сообраќајни незгоди и воедно уште еднаш ги повикуваме сите граѓани да бидат внимателни и одговорни учесници во сообраќајот, да покажат личен пример и секој учесник во сообраќајот да даде свој придонес за безбедно одвивање на сообраќајот.
По повод јубилејот, 55 години постоење и активно дејствување на Републичкиот советза безбедност на сообраќајот на патиштата, вчера вечер во салата на Македонскиот народен театар во Скопје се одржа свечена академија. На настанот присуствуваа голем број на афирмирани лица, експерти, професионалци и многу други кои изминатите 55 години беа дел од работата на РСБСП и дадоа свој личен придонес и белег во унапредување на сообраќајна култура и подигнување на безбедноста во сообраќајот на патиштата.
Во рамки на академијата свое обраќање имаше претседателот на РСБСП Стаменковски која ја потенцира убеденоста и силната верба во тоа што Советот го работи и нагласи дека Советот и во иднина со уште посилен интензитет ќе работи за добробита на заедницата и општеството со единствена цел безбедно патување и сообраќај без жртви.
Државниот секретар во Министертвото за внатрешни работи Сања Димитриевска во своето обраќање на настанот истакна дека Министерството за внатрешни работи во своето работење става подеднакво акцент, како на превентивната компонента, и сообраќајно – превентивното дејствување, така и на присилата, односно санкционирањето на учесниците коишто не ги почитуваат сообраќајните правила и прописи но потенцира дека колку и да настојува Министерство за внатрешни работи, не можеме да биде на секој дел и во секое време од сообраќајната мрежа во Р.Македонија, и токму поради тоа, нагласи суштински важна е улогата на РСБСП во градење на ефикасен систем за справување со сообраќајните незгоди и жртвите од сообраќајни незгоди преку едукација и подигање на свеста и одговорноста на учесниците во сообраќајот.
Во знак на добра соработка, силна поддршка и делење заедничка визија за побезбеден сообраќај плакети добија: АМСМ, МВР, Црвен Крст и Никола Ангелески – поранешен претседател на РСБСП.
Заложбите на Републичкиот совет за безбедност на сообраќајот на патиштата секогаш биле и ќе остана во насока на издигнување на безбедноста на патниот сообраќај, како највисок општествен приоритет и употреба на целокупниот институционален и општествен потенцијал за намалување на бројот на настрадани лица во сообраќајни незгоди во Република Македонија./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.