Daily news
Синдикатот на „Фени“ побара судот да го отфрли барањето за стечај, мнозинството вработени против барањето
Претседателот на Синдикатот на „Фени“, Ѓоре Палитов, попладнево апелира судот во Велес на утрешното рочиште да го отфрли барањето за стечај на фабриката. Тој тврди дека фабриката е во добра кондиција и поркај тоа што има долг од над 65 милиони евра и им должи плата за октомври на вработените, а производството е сопрено веќе трет месец.
„Компанијата има сопственици, има инвеститор и има услови за рестартирање. Во ситуација кога на светските берзи цената на никелот расте и кога беше обезбедена поевтина електрична енергија, одлучија да поведат стечај, дури и за побарувања што не се достасани. Доколку има друг поволен инвеститор, за кој банките само шушкаат, нека го повикаат на рочиштето утре во Велес и во согласност со законот со обезбедени гаранции нека го запре овој процес со законска постапка“, рече Палитов.
Тој апелира УЈП, каде што фабриката има долг од 5,5 милиони евра, да одобри исплата на заостанатите плати од повратот на ДДВ за што веќе испратиле барање, а судот во Велес да ги разгледа сите последици од евентуалниот стечај на „Фени“ за Кавадарци и околината.
„Во случај на отворање стечајна постапка само според законските прописи, процесот ќе трае најмалку четири месеци. Како Синдикат ги повикувам банките јавно да кажат еден пример во Република Македонија на компанија каде што тие побарале стечај и таа компанија се рестартирала? Нема“, рече Палитов.
Мнозинството вработени во фабриката, пак, велат дека и за ваквите апели Палитов не ги консултирал, туку одлуката ја донел во тесен круг кој сè уште го поддржува.
„Палитов и целото раководство се продолжена рака на бугарски ‘Енекод’. Тие се во фабриката веќе еден месец, но ниту ни исплатија плата, ниту почна производството ниту, пак, доставија план за отплата на долговите. Тоа е инвеститорот што го спомнува Палитов, а нам веќе ни е јасно дека само сакаат да ја одолжат постапката за стечај за да ги скријат валканиците со кои ја уништија фабриката гигант“, велат вработените во „Фени“.
Тие најавуваат дека ќе се појават утре во судот во Велес за да дадат поддршка за отворање постапка, во која преку стечај што ќе значи реструктуирање, ќе се бара сериозен инвеститор. Велат дека одлучиле да им веруваат на најавите за сериозни инвеститори по минатонеделните посети на фабриката од страна на заинтересирани инвеститори кога „Енекод“ ја изиграл нивната доверба. За тоа денес ги побарале автобусите од раководството, но им било кажано дека мора првин да имаат дозвола од полиција за тоа, а кога ја извадиле, им рекле дека автобусите не се регистрирани, па не можат да ги користат.
„Се организираме да се појавиме со приватни автомобили, иако сме без плати. Сакаме да се чуе нашиот глас оти Палитов одамна не ги застапува нашите интереси, туку интересите на бугарската компанија“, велат вработените.
Стечај за „Фени“ иницираа банките кредитори на комбинатот поради долг што надминува 60 милиони евра, од кои 40 милиони кон нив и 20 милиони евра кон други доверители, а 5,5 милиони евра раководството на фабриката пријави дека ѝ должи на УЈП.
Судот во Велес утре напладне ќе направи втор обид да одлучува дали да се отвори стечајна постапка за „Фени“. Првото рочиште не се одржа оти директорот на „Фени“ побара изземање на судот со барање за стечајот да одлучува суд во Скопје оти банките се од Скопје, но Врховниот суд го отфрли барањето и го врати предметот во Основниот суд во Велес.
Банките на ја исклучија можноста за нови правни опструкции за постапката и укажаа дека тоа ќе биде само на штета на вработените.
(М.И.П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.