Daily news
Скопје и Сараево се збратимија
Градоначалникот на Скопје, Петре Шилегов, и градоначалникот на Сараево, Абдулах Скака, потпишаа спогодба за соработка меѓу градовите Скопје и Сараево.
Со спогодбата се очекува да се унапреди соработката и размената на информации и искуства во областите на дејствување во рамките на надлежностите на градските управи: културата, културно-историското наследство, образованието, спортот, урбаното планирање, туризмот, енергетската ефикасност, меѓународните односи, прашањата поврзани со младите, здравството и социјалната политика, градските јавни служби, заштитата на животната средина, невладините организации и други области кои се од интерес за двата града.
Скака се заблагодари на градоначалникот Шилегов за приемот, му го честита изборот за градоначалник и му посака успешен мандат.
„За Град Сараево ова збратимување е од исклучителна важност бидејќи Скопје е првиот главен град од нашата поранешна заедничка држава Југославија со кој се збратимува. Скопје и Сараево како градови имаат многу сличности и заеднички вредности и верувам дека ова е добар почеток на соработката и за двата града. Особено ми е драго што Скопје и Сараево се градови коишто ја негуваат и се познати по нивната мултикултуралност и мултиетничност и сигурен сум дека и во иднина ќе продолжиме да се движиме во таа насока“, изјави Скака.
Шилегов го искажа своето задоволство од овој чин потенцирајќи дека Сараево е дваесеттиот град со кој Скопје се има збратимено.
„Ова е последниот главен град од поранешна Југославија со кој Скопје се збратимува, со што за нас ова претставува добар крај, а за Сараево уште подобар почеток. Во овие неколку денови на разговорите со градоначалникот Скака констатиравме дека можеме да оствариме сериозна соработка, особено поради тоа што и двата града се соочуваат со слични проблеми, а тоа се проблемите со загаденоста на воздухот, со урбанизмот и инфраструктурата. Нашата досегашна и идна соработка ќе ги развиваме во духот на соработката, пријателството и меѓусебното почитување. Се надевам дека од нашата соработка ќе произлезат многу заеднички мерки и проекти со кои ќе се подобри функционалноста и работата на нашите градови со крајна цел подобрување на квалитетот на животот на граѓаните на Скопје и на Сараево“, изјави Шилегов.
На потпишувањето на спогодбата, покрај градоначалниците присуствуваа и амбасадорот на БИХ во Македонија, Лепа Бабиќ, претседателот на Советот на Град Скопје, Љубица Јанчева, членови на Советот на Град Скопје и претставници на делегацијата од Сараево, како и претставници на бошњачката заедница во Македонија.
Покрај потпишувањето на спогодбата за збратимување, градоначалниците го потпишаа и меморандумот за соработка помеѓу Градот Сараево и Јавното сообраќајно претпријатие – Скопје, за размена на искуства од областа на јавниот транспорт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.