Daily news
Снегот блокира повеќе патишта во Македонија, отсечени десетина села
Според најновите информации од Центарот за управување со кризи, неколку патишта во околината на Скопје, како и во другите делови на Македонија, се целосно непроодни поради врнежите од снег.
Во општина Кисела Вода патните правци од Марков Манастир до селата Црн Врв и Патишка Река не се проодни за сообраќај за сите видови возила, како и во општина Зелениково, патните правци од станицата Зелениково до селата Добрино и Дејковец.
Во општина Чучер Сандево патниот правец кон селата Брест, Малино и Танушевци е непрооден и тие во моментот немаат ниту електрична енергија.
Што се однесува до патиштата во преостанатиот дел од земјава состојбата е следна:
Прилепски Регион
Во општина Крушево регионалниот патен правец Крушево-Пуста Река не е прооден.
Гевгелиски Регион
Во општина Валандово локалниот пат Чалакли-Башибос не е прооден.
Струшки Регион
Во општина Струга непрооден е патниот правец што ги поврзува селата во Малесија, односно патниот правец од с. Присовјани до хидроцентралата „Глобочица“ и патниот правец с. Бороец-с. Јабланица.
Велешки Регион
На подрачјето на општина Чашка сообраќајот се одвива отежнато со користење зимска опрема, освен локалниот пат с. Богомила-с. Нежилово-с. Ореше, кој е непрооден и со користење зимска опрема. Се преземаат активности за расчистување на снегот на локалниот пат с. Дреново-Долно и Горно Јаболчиште. Во општините Свети Николе и Лозово во моментот, поради снежни наноси предизвикани од силниот ветер, не се проодни патните правци кон селата Кнежје, Орел, Трстеник, Павлешенци, Малино, Крушица, Преод и Долно Ѓуѓанци.
Штипски Регион
Во општина Штип непроодни се патиштата кон ридско-планинските села Шашаварлија, Брест, Горачино, Танатарци, Пухче и Љуботен. Во општина Карбинци непроодни се сите ридско-планински села на планината Плачковица, што е условено со чистење на регионалниот пат с. Аргулица-одморалиште „Плачковица“.
Липковски Регион
Во општина Липково патните правци што гравитираат кон планинските села се непроодни.
Кумановски Регион
Регионалниот пат Крива Паланк- с. Огут е непроден, отсечени се селата Габар, Метежево, Огут и Нерав. Регионалниот пат Крива Паланка-с. Луке е прооден во зимски услови. Локалниот пат с. Дурачка Река, м.в. Метов-с. Дренак е непрооден.
Регионалниот патен правец Ранковце-с. Герман е непрооден.
Гостиварски Регион
Во општина Маврово-Ростуше патниот правец кон с. Галичник е непрооден. Во општина Врапчиште сите патни правци се проодни, освен кон Пожаране и Ломница, кои сè уште не се проодни.
Од „Македонијапат“ и АМСМ известуваат дека забрани за тешки товарни возила има на патните правци крак Маврово-Дебар, Крак Стража-Кичево и на планинските премини Пресека и Ѓавато.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.