Daily news
Собранието прифатило најмногу закони од Тунтев, најмалку од Димовски
Собранието на Република Македонија спровело 43 постапки за донесување или изменување закони. 14 од нив се донесени, 17 сè уште се во процедура, 3 од нив не се прифатени, а 9 се повлечени. Од нив, 13 се измени на постојни закони, а еден е нов. Мониторингот на „Мост“ е за периодот од 1 јуни до 30 септември.
Пратеникот од редовите на СДСМ, Томислав Тунтев, предложил најмногу закони во Собранието – 13. Од нив донесени се 8. По него, пратеникот на ВМРО-ДПМНЕ, Илија Димовски, предложил 11 закони, од кои донесени се 2, а исто толку не се прифатени. Пратеникот на ДУИ, Ејуп Алими, предложил 9 закони и исто толку му се прифатени. Претставникот на „Алијансата за Албанците“ има 7 донесени закони.
„Карактеристика на овој период беа десетте продолженија на седницата на која како точка на дневен ред беше разрешувањето на јавниот обвинител во текот на јули. Седницата се одолжи главно поради продолжувањето на опструкцијата на работата на Собранието од страна на опозицијата. Во август Собранието беше на редовен одмор, а по враќањето, работеше до 25 септември затоа што на тој ден започна изборната кампања за локалните избори, кои се одржаа на 15 октомври 2017. Сите овие елементи несомнено имаа свое влијание врз работата на Собранието и неговата продуктивност во периодот на набљудување“, се наведува во мониторингот.
Според Националната програма за усвојување на правото на Европската Унија, а во периодот на мониторинг, било предвидено да се донесат 8 закони за хармонизација на домашното право со правото на ЕУ. Била започната законодавната постапка за еден закон за хармонизација со правото на ЕУ, а тоа е законот за употреба на јазиците. Дополнително, извештајот на „Мост“ вели дека програмата предвидува донесување закон за изменување на Законот за минималната плата. Во овој период беше донесен таков закон, но тој не беше третиран како ЕУ-закон.
Во периодот 1 јуни 2017 – 30 септември 2017 година биле одржани 82 седници на комисиите, заедно со 15 продолженија, a усвоени се само 24 записници. Собранието одговорило на сите барања од „Мост“, при што невладината организација добила 24 усвоени записници од одржани 97 седници на 18 од вкупно 21 комисија. Комисијата за локална самоуправа и Комисијата за уставни прашања не одржале ниту една седница во периодот на набљудување. Постојаната анкетна Комисија за заштита на слободите и правата на граѓанинот започнала една седница, но таа не е завршена во периодот на мониторинг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.